Chin, Lai, Zo Miphun kong

Chin, Lai, Zo Miphun Kong by Pu Lian Uk   From: Lian Uk <lian1@verizon.net> Subject: RE: [zophei] Chin,Lai ,Zo Miphun kong To: zophei@yahoogroups.com Date: Tuesday, December 8, 2009, 3:58 AM   Kawi Sang,   Hi ca na ttial mi hi thil a dik ning vun ttial nak ding a kong na vunchuah pi I a tha ngai. Hibantuk in theih fian lo mi kong ah a dik ning kawl hi a ttha tuk mi ruahnak asi.   Mah na tialmi Chart hi a palh cikcek mi ruahnak a si. Laimi/Chin mi vialte a khuaitu ral Chart a si. Hi chart hi aho Laimi hmanh nih a dik tiah pawm mi a si lo. Debate tuah lo mi Chinmi hrawh nak asi ti a thei lo mi minung nih thil a dik ning theih huaha  lo in an ttial mi asi. Chin mi kong athei mi mizei hmanh nih  an pom lo mi asi. Hmangti hlah u.   Hi ning hi kan zulh ah cun Laimi Chin timi hi a um lo.  Chin ti cun zeitin dah hi vialte ASHO,Cho,Khumi, Mizo, Zomi ti hi  hi aa peh thiam ning kong tial lo in, ruahnak sawh   arbitration long in an peh mi asi.   Chin cun zeitin dah Asho,Cho,Khumi, Laimi, Mizo,Zomi ti cun aa peh ti hi aa peh ning prove nak a um lo mi asi.   "Chin History, culture & Identity" timi ca uk chung "Emergence of Chin Hills Regulation 1896: Its scope and importance in History" ti mi Page 261 chungta kha ttha te in rak zoh te u.   Khua min rammin hi amah le a holh zulh in min tampi in kawhnak um a hman khi ruah awk ttha ngai asi.   Tahchunhnak fawibik in kan lak mi ah cun: Falam cu Tlai sun holh in kawh nak asi, Za Hau lei nih Far-tthawk an ti i, Zaniat lei nih Balai an ti. Falam khua khat nih holhdang dang minsak zulh in min pathum a ngei.   A ram in kan lak ah cun  India ti cu Hindi holh in Bharat an ti. Urdu holh in Hindustan an ti. India nih minthum angei.   Germany cu an mah German holh in Deustchland an ti.  Cu caah min hnih an ngei.   Cu bantuk in Europe ram atu Laimi umnak ram Sweden, Norway, ti vial te khi atlawm bik min hnih longte an ngei. Pu Perhkalh nih Europeram min tampian ngeih mi cazin a ttialmikha nanhmuh awk ttha ngai asi.   Cu bantuk in Chin ticu Haka holh in Laimi kan ti I, Tedim holh in Zomi kan ti I, Mindat holh in Cho kan ti cu asi. Rangoon University  Chin student Union Annual Magazine 1953 in 1968-69 tiang an chuah mi a holh kip in Chin ti cu Mindat holh in Cho, Falam/Haka holh in Laimi, Tedim holh in Zomi ti cu an rak hmanzungzal mi asi. Va`cek tthan hmanh u.   Hi ti Zomi phundang Laimi phundang in a ttialmi hna hi Tedim holh athei lomi nih an ruah sual bia ah a dik loning pi in an ttial mi asi.,Tedim holh kan chim ah "Ei Zomi te kan I ti" , I kanmah lila kha Falam/ Haka holh ah kanvun itthial I kanchim tik ah  "Kan mah Laimi"  kan I ti tthan ve mi hi atu nifa kan hman mi asi. Tedim holh nan theih lo nan thiam lo ah cun a ruah awk nan thei lo kho men I asi.   Hi kong hi Tedim le Falam Haka apa hnih in a thiam mi vialte nan hal hna ah cun  Chin ti cu Tedim nih Zomi an ti I, Falam Haka nih Laimi an ti i, Mindat nih Cho ti an hman mi cu 1968-69 Uniniversity Chin Literature and Culture Sub Committee Annual Magazing chunghrim ah fiang tuk in hmuh khawh mi asi.   Cu ruanghrim ah hi na hman mi Chart cu a palh cik cek mi a thei lomi nih an ruahnak an ttial sawh sawh mi asi.   Hikonghi adik ning na theih duh ah cun "Chin History, culture & Identity"  timi ca uk chung "Emergence of Chin Hills Regulation 1896: iIts scope and importance in History" timi ca uk Page 261 chungta cu ttha te in rak zoh hrim te u.   "Falam le Hakha nih CHIN cu LAIMI tiah kan leh tikah Tidim le Mindat zong Laimi kan siter chih hna" na ti mi hi adik mi asi. Kan si ter chih hrim hna. Zeicah tiah Falam Haka holh in Chin timi cu Laimi asi ruang te ah cun asi.   Kawl nih cun Bama an I ti na in pei Laimi holh in Kawl ti inkan auh ca hna ah Lai holh kan chimtik ah Bama tiah auh lo in Kawl tiah kan au hna cu ta. Na hmanghballo maw? na hman hrim ko lai nifa te Haka Falam Tedim  kanzapi in  Kawl cu Bama kan ti hna lo/ Kawl kanti hna.   Tedim nih Bongsa an ti mi cu bongsa ti hlah u Cawsa ti u ti in zeitin dah na ti khawh hna hnga,  an holh in bongsa an timi cu an mah holh asi caah ti hlah u kan ti kho hna lo. Cu bantuk in Kawl nih Thailand cu Yodaya anti hna. Thailand nih Yodaya kan ti hlah u an ti hna lo, zeicah tiah Kawlholh in Thailand ti an kawhnak min asi.   Cubantuk in Geramany an mah holh in Deustchland an i-ti mi cu Mirang holh in Germany an ti hna caah an mah holh ngeih kha Germany nih an ruah piak thiam hna. Atu hika kanca ttial hrimah cun pei English England ti cu an min asi ko na in Haka Lai holh in Mirang kan ti hna hi asi cu. Kanmahholh in English kha kan kawhnak hna min asi ve. Mirangnih Mirang kantihlah u anti lo, kanmah holh te in kankawh nak hna min asi ve caah.   Tuluk zong an mah holh in Chunkuo an ti ,Japan zong anmah holh in Nippon  an ti I,  Korea zong anmah holh cun  Hankok ti bantuk a si.Asina in  Mirangholh ah mindang an ngeih dih khi ruat hmanh.   Cu ticun khua min, ram min le mindangdang zong amah le holh zulh in  min tampi an ngei cio hna.Hibantukkonghiv uitamtukkan ttial cang, nanrellem lo caah asi lai.   Rose hlingngeipangpar cu Kawl nih phundang Mirangnih phundang in rose nih mintam pi holh kip ah angei dih,.   Cubantuk cun thil akal caah na hman mi chart hi Tedim holh a thei lo mi nih an ttialmi apalh cikcekmi asi va hmang ti hlah. Cun na ttialrih mi ah:   " i, Tidim le Mindat nih CHIN cu Zomi or Cho ti in an i leh ve tik ah Falam le Hakha zong hi Zomi or Cho an kan siter chih ve"; na timi hi  a dik mi asi ning a cung lei ah kan ttial dih cang.Ttha te in rak ruat hmanh.Na vunttial rih mi ah:   "nain nihin tiang kan kal ning ahcun cohlang mi a si rua lo" na timihi cohlan mi asi tuk cang. Tedim holh athiam lomi Mindat holh a thiam lo mi nih cun an thei lo rih kho men ko. Asina in a theimi nih adik anti dih lai; Cohlan mi asi tuk cang, lung aw ttawm awk a um lo.Na ttialrih mi ah:   "Zeicatiah, Zomi a timi  le Cho a timi zong laimi ti cu an duh bak lo bantuk in Zomi le Cho si cu Laimi aa timi nih kan duh ve lo"  na vun ti mi ah  acung ah kan ttial dih cang; Bama ti cu Laimi nih Kawl kan ti tik hna ah si she,  Thailand cu Kawl nih Yodaya an ti tik hna ah si she, Deutchland cu Mirang nih Germany an titik hnaah si she, an mah an duh duh lo kha asi lo I,  an mah le holh ning in an rak ngeih mi min asi kha universal in an pawm cio mi asi ti hi vialte tet-te kan langhter ah cun theih khawh lungtlian khawh awk ngai asi cang.   Cucaah hina hman mi chart a palh ning hi research dang tuahhau lo in hika kan ttialmi vulei cung thilkalning hrim nih hin hi chart cu hmantlak lo hnawmbawm chunghlawh ding men asi ning alang ter kko tuk cang I hi Chart hrim hi zeitik hmanh ah hman awk asi ti lo ti theih khawh nakngai asi. Damte in. Lnk.   ---------- From: zophei@yahoogroups. com [mailto:zophei@ yahoogroups. com] On Behalf Of Zasang Cinzah Sent: Monday, December 07, 2009 11:43 PM To: zophei@yahoogroups. com Subject: RE: [zophei] Chin,Lai ,Zo Miphun kong   Key Points:   1. "[Mirang nih ]Mizeimi phundah an si ti an vun hlat tikah…. kum 750AD  lio Kawlram ti in Anaw[z]rah tha siangpahrang nih a rak dirh khawh hlan kum 300 lio in  ttialmi lungca ah Chin ti in an ttialmi miphun nunphung le holh a hmang mi Chin miphun ram a si kha Mirang nih an rak hmuh khawh hna."   2. "Chin timi min chung ah aa tel dih mi an si tiah cu upadi chung ahcun mi rang nih an ttial." 3. "Chin timi cu Falam le Haka nih Laimi tiah an ileh I Tedim nih Khamtung mi ti le Zomi ti in an leh . Mindat lei nih Chio tiah an leh ve. " Falam le Hakha nih CHIN cu LAIMI tiah kan leh tikah Tidim le Mindat zong Laimi kan siter chih hna i, Tidim le Mindat nih CHIN cu Zomi or Cho tiin an i leh ve tikah Falam le Hakha zong hi Zomi or Cho an kan siter chih ve; nain nihin tiang kan kal ning ahcun cohlang mi a si rua lo; Zeicatiah, Zomi a timi  le Cho a timi zong laimi ti cu an duh bak lo bantuk in Zomi le Cho si cu Laimi aa timi nih kan duh ve lo.     Cucaah, Mirang nih Upadi ah an ttial bantuk in CHIN chung ah  aa telmi MIN {miphun] an si timi ruahnak; Human Right Watch Website ah an tarmi te hi CHIN Miphun kan sining te cu a si ko lai dah! Damte in Asang.     ------------------------------ "Serve with gladness"

Kan Pulpit in kan Miphun remh kan hau cang

Kan Pulpit in kan Miphun remh cang hna usih   From: lianhei cung <lianheicung@gmail.com> Subject: [Metkhuabo] Kan Pulpit in kan miphun kan remh hna lai To: "chinuniversityalumni" <chinuniversityalumni@googlegroups.com>, tabclairam@googlegroups.com, Metkhuabo@yahoogroups.com Date: Saturday, November 28, 2009, 7:14 AM   Dawtmi miphun hawi hna, Kan miphun kong ah mah le ruahning cio in tial le langhter a si, kei zong ka hmuh ning in kan miphun caah ka ruahnak langhter ka duhmi a um ve. Minung hi nang na palh kei ka palh ti kan i el nak in kan ca i a thabikmi theih, ruahnak i pek le tuah hi a biapi deuh. Ram tampi cu phanh khawh a si lo nain Malaysia cu kan miphun ning nawn in rathnawhmi le kan duhmi hngahnak hmun ah kan hman cio. Hi Malaysia ram phan Laimi cung lawng in ruahnak kan chuah ahcun a dik thlu lai lo nain a tam u a si lo le, zeimawzat cu a hmaan kho men ko ka ti. Refugee in kan kalnak bik hmun a si caah ramthumnak a phanmi hi a tam u cu Malaysia in phanh a si i, cu in kan vai kalpimi nunzia cu hlonh thlu khawh cu a si lem lai lo. Cu kan zia le kan nunning kha Lai nunphung ( Chin Culture) ah ai cang te ko lai. Kan nunphung kan kalpi ning hi zoh tikah tih a nung ngai ko. Tuan deuh i ka rak tial bantuk in nitlaklei Khrihfa miphun ah Laimi hi can kan awl ngai ko cang. Hiti zozawt ngai le fello ngai, hruphrap ngai in kan nun hi mah le hmuh ning in chim ve ning law, kan pulpit in kan rak i cawnpiak ning he ai pehtlai rua ka ti. Kan biaknak le kan pulpit nih kan miphun hi a thanchoter ko, asinain thil timi cu a tha thlu lawng um phung a si ve lo bantuk in kan pulpit caan sau deuh a rauh cun nitlaklei lawng uar tuk i mah ram ah um duh lonak lungthin pu tiang in a kan cawnpiak caah aho cio paoh Refugee hi Paradise ah kan ruah sualnak a hram pakhat cu a si. Kan cozah puh ding a rak um hi cu Laimi caah vanthat ngai a si ve. Ram dang ah miphun dang zong an pem cio ko nain an ram kir than le an ram ah thil tha tuah ding hi an i tim peng. Laimi hi kan si ning in chim usih law, Ram tha seh ti cu kan kaa in kan chim ko nain (ahlei in ramleng phan Laimi nih ) ram that tak lai cu kan duh taktak rua lo ka ti, a sullam cu ramthumnak phan ciami nih kir lai phan a si i, Malaysia hrawng, India hrawng in Refugee hngakmi nih hawi ramthumnak phanh i kan ram kir lai cu tih taktak a si, cucu Laimi kan dirhmun taktak a si. A cunglei kan langhtermi tete hi Laimi kan lungput zeimawzat te khi a si, hi kan lungput ai thoknak a hram cu kan biakinn ai thokmi a si. Ruah caan a phan ngai ve cang. Laimi hi ram leng kan chuah tikah lung a rawk ngaimi cu Ramchung nak in a let tamtuk in kan i dawtnak ai then, kan miphun in kan i then i donghnak ahcun kan phun hna hi Lai ( Chin ), ti loin kan khuamin chin a hau te ko rua lai. Hlan kan pa le Khrihfa ai thokka i kan Pastor te cu mawh chiat awk an um tuk lem lo, Pathian bia te am lam chimh kan Khua cio Khrihfabu a thawnnak ding an kan chim, upat awk ngai an si. A vun dawttu Pastorte pawl nih ramdang an kal i, ramdang a nuamhnak an bia in an kan chimh pin ah an kan pemtak tikah kan miphun nih pem in than kan i tim. Cun Sunday School kan hngakchiat lio ah an rak kan chimhmi cu kan Khrihfa biaknak i zumh awk tlakmi hna tuanbia ( Eg. Adam, Esther, ... tbk ) an rak kan chimh tikah kan upat tiang kan i thanpimi cu Pathian a hna a tla lai maw ti in kan sual ko bu zong ah ruahnak kan ngei. A caan nih a vun kan kalpi lengmang hi a hlei in 1990 hnulei pawl ah Sunday School i cawnpiakmi cu kha zumh awktlakmi hna kong chim ti lo in, na piangthar maw? ti deuh lawng kan cawn tikah Khrihfa phung i dinnak cu kan kaltak diam i, Bible tlaih in lih chim hi kan caah a awl ngai ko cang. Dinnak timi cu Lai miphun caah David Van Bik le Bawi Hu dictionary chung lawng ah neih dawh kan si cang, kan nunnak ah dinnak kawl cu a har taktak ko cang. A zei a va si hmanh ah Miphun kong ahcun a tlai ti um lo in thil tha cu kan theih le cangka in tuah hi a tha bikmi a si ko. Atu ning in cun Laimi cu Pulpit in ai hruaimi miphun ah kan cang ko rih le, kan pulpit cawnpiak ning hi thlen a za cang ko lo maw? Kan miphun a ngan a damnak ah a herh lomi thil tampi hi kan pulpit in hloh a za cang ko rua, kan caah a thami hi kan pulpit in aupi a hau ko cang. Cuti cun kan miphun hi serhram i thok cang hna usih, a hlan ahcun kan pulpit cio in mah le associations cio tanhnak kha kan rak chim tawn, pianthar i sual khawh ti lonak kan rak chim, ramleng le phaisa lawng in ram remh khawh a si ti in kan rak aupi, cu nih a chuahpimi cu Miphun tlau-nak le miphun theknak a chuahpi cu mithmuh kuttongh a si ko. Tu chun caan ah cu kan rak i palhnak vialte cu a thar in ramh cang hna u si. Kan miphun le kan thlarau a damnak ding caah kan Pulpit cu a dikhmaan ning te in hmang cang hna u si, kan cozah sianginn hmanh in kan miphun a hruai te ding kan fale kan chimh khawh hna lo, kan church school ( Sunday School ) tal in miphun ca ah thlaici cin le thlak hram thok cang hna u si. Upatnak he Lian Hei Cung ------------------------------ "Serve with gladness"

THO le LAI KUMTHAR by Pu Lian Cin

LAI THO LE LAI KUMTHAR ICBC Tho Puai Pu Lian Cin Biachim mi   Tucaan ah biachimnak caan ka hmuh ve caah hi proggramme a tuah tu Nunphung le Zatlang hruaitu upa hna sin ah siseh, hi bantuk caan rem a kan pe tu kan Pathian sin ah siseh lawmhnak bia chim hmasa ka duh.   U le nau hna, nihin hi, Nunphung le Zatlang  caan hman sawhsawh long siloin, Laimi nih kum 40 reng lo, kan rak theih ti lo mi, kan rak hngalh ti lo mi, Tho puai, theih nawlhnak le langhter thannak caan zong a si ve  caah, DOT HNIH in biachim ka duh.   Dotkhatnak….. Nunphung le Laimi    Mirangholh in ( Illusion ) timi bia a um i cucu Minung kan nunnak ah hin hmun tampi ah a um lengmang. Illusion timi cu zeidah a si ? Illusion timi cu thil sining hi a mah a sining tein hmuh lo in, a si lo ning pi in hmuh, a si lo ning pi in theih, a si lo ning pi in hngalh ti khi a si. Tahchunnak ah ram avai mi pa cu, zanlei khua a muih nawn tik ah thinghmui pakhat khi a hei zoh i sa ah a rel. Fiangfai tein a ngia ti lo, sakhah kha a duh caah meithal in thinghmui pi cu a kah. Cucu Illusion cu a si. A si loning piin a hmuh, a ruah, a hngalh ti khi a si. Hi bantuk thil umtuning hi Laimi nih kan Nunphung, kan theihning, kan ruahning, ah hin hmuntampi ah a lang lengmang.   Vulei cung thil umtuning kan zoh tikah, miphunkip nih nunphung cu ngeih cio a si i cu an nunphung cu an biaknak in tlangkawm a si lengmang. Bia dang in kan chim ah cun Nunphung timi chung ah hin Biaknak hi hmunhma a khuar ve lengmang. Cu long siloin, cu an nunphung cu an ngeihmi thilri, eidin in an sunlawi ter. Tahchunnak ah nupithit le va ngeih hi Biaknak a si lo. A si nain Thitumpuai an tuah tikah Kawlmi nih Phungki le Biteih Saya timi kha an auh hna, Lawki phung kan um lio ah Ar-at tu nih thlacamnak a tuah, Khrihfa Biaknak nih Pastor te nih lehthahnak tuah a si. A si nain Kawl le Lai kan ihal, kanithit, kan ichawnh ning cu a dang. Hi thil umtuning ah nunphung timi le Biaknak timi hi a ri fiang tein a lang ko. Cu bantuk in Kawl Tincianpuai khi an kumthar a si ve nain an Biaknak in an fehter bantuk in Laimi nih Tho puai, Hlukhla puai, Sariahthawh, Laamserh puai, Khuangcawi puai, Bawite, Bawipi an bawi lio ah siseh, Tirawl tampi an lak I lawmhnak puai an tuah mi Rawlsawmtuk, Cakeifim tibantuk puai an tuah tik ah siseh, an biakmi khuahrum sin ah thlacamnak tuah a rak si ve.   Cu bantuk cun Laimi hi Lawki Biaknak chung kan rak um lio ah kan Nunphung kan hmannak zawn tete ah Lawki Biaknak in tlang kan kawm long siloin kan rak eidin mi tirawl hna in kan sunlawi ter lengmang. Cu tikah Nunphung le Biaknak hi hmun tampi ah then awk har ngai in an ihrual, an isengchih. Cu bantuk dirhmun kan si lio ah Khihfa Biaknak  Lairam a vun luh ve tik ah, Laimi nih kan Nunphung, kan Biaknak le kan eidin hna kha a hliah kan rak phoih thiam lo caah le a ri kan rak thenthiam lo caah, cheukhat kan nunphung dawhdawh hna cu Lawki Biaknak he hmunkhat ah hmawnbawm ah kan hlonh chih hna. Cun Lairam a rak kaimi Missionary pawl hi Bibleca a cawngmi cu an si ko hna nain miphun dang sin ah zeitin thutdir awk, ruahawk tuahawk tibantuk Training pakhat hmanh an rak ngeih lo tik ah Biaknak le Miphun timi kha a ri an rak khiak piak thiam hna lo. Ruahnak zong an rak pe thiam hna lo. Mirang nih Africa ram an thlah mi Missionary pawl hna tu khi, Training tha tein an pek mi hna an si caah nihin ni tiang Africa pawl cu an phunglam thlau lo in Khrihfa ah an cang hna. Pathian an biak tik hna ah anmah an pupa hla aw hmang in siseh, an laam kan kui zong hngakchia upa in an thiam rih. Cucu Africa way of worship an ti theu. Cu bantuk akhyuanhazi ci laimi kan rak sung.    Bia le Hla timi chimkem bia a um. Chim duhmi cu Bia thuk Bia tha Bia hmual cu Hla ah a um ti a si. Kan pupachan ah Hla cu Laamnak nih a zulh cawlh. Cu bantuk Laamnak le nuamhnak hmun ah cun, an rak ngeihmi, Zu kha eidin caah an rak hman. Bia, Hla, Laam le Zu cu hmunkhat ah an kal ti tik ah, Zu kha a hrampi ah an rak ruahsual i Lai Laam laam cu khuachia biak tluk ah an rak ruah sual. Cu caah Lawki phung a ummi thitumpuai le chunhthah long ah Lai laam laam a si i Khrihfa chungkhar thitumnak ah Laihla le Lailaam cu an rak hnon i Lawki Biaknak he hlonhchih a si.   Cu long siloin Paih zong hi Laimi kan ngeihmi Lentecelhnak a si. Lawki Biaknak ah a um mi nih Thitumpuia le adang Puai phunphun an tuah tik long ah Paih cu ser a si i Khihfa a si mi nih Puai an tuah tik ah Paih cu hlonh a si. Kum relnak ah an rak hmanmi Tho puai hmanh hi Lawki Biaknak he kan pehtleih ter i Thlaithar Tho tiin kan thlen hnu ah Tho puai cu Khrihfa hna nih kan rak hnon, kan rak hlonh.    Duh sah tein puai a ngei lomi miphun ah, kan theih lo kar ah, kan pil thluah mah. Khihfa Biaknak he a pehtlaimi X'mass le Kumthar puai dah lo cu zei puai hmanh a leng ti lo. Cu caah X'mass le Kumthar puai tuah, eidin, inuamh cu Laimi kan caah hin a sunglawi khun. A ruang cu zei puai hmanh a um ti lo caah a si bik. Cheukhat nih Laimi cu Khrihfa miphun kan si ti tiang in kan chim. Vulei cung ah Khrihfa miphun tihi a um thiam mi a si lo. Kawl miphun, Kala miphun , Mirang le Zapan miphun zong Khrihfa an um ve ti hmanh kan ruat ban ti lo. Cu ban tuk thil kal ning cu Ilution timi cu an si dih.    Lawmh awk ngai a si than mi cu, kanmah Khihfa lila nih kan nunphung a bia pit ning, kan herhning, kan vun ruahnawlh, kan vun kawlthan, kan vun tunmer than tikah kan mino hna nih kan bia le kan hla, kan laam le kan kui, kan thil le kan thuam hna zah pi nak um ti lo in vulei cung tiang thanh le hmuhsak ngamnak lungthin an vun ngeih than tik ah kan miphun kan himbawmnak a thar in a chuak than tiah a langh caah lawmh awk ngai a rak si. Nunphung upat le kilven hi rumnak a si lo, fimnak zong a si lo, thancho zawng a si lo, A simi tu cu miphun dirkamh, miphun dawt a si tihi chimduhmi a si.   Cu caah nihin zong Nunphung le Zatlang  hruaitu upa hna nih an kan hruainak ah hin lungtho tein itel, cawlcangh cio awk in sawm kan si.   Dothnihnak…..Laimi le Tho   Tulio hrawng  E-mail i an tial, an ceih mi pakhat cu Tho le Zu ti hi a si. Tho cu Tho a si ko i Zu cu Zu a si ko. A fiang tukmi cu Tho cu puai a si i Zu cu din ei awk thil khi a si. Puai kong maw kan ceih, eidin kong dah kan ceih, tihmanh a fiang lomi kan lo. Hi bantuk thilhmanthlak pakhat Laimi sin ah a um mi cu Chin National Day le Zupu tihi a si. CND tuah ah cun Zupu tuah a hau tiphun in kan ruah. CND Falam ah minung 5000 nih an rak ceih an rak khiah lio ah zei Zupu um hlah. Zupu cu CND hlan in siseh, Zu cu Tho puai an tuah lo caan zong ah siseh a um ciami a si tiah kan theih ko bu ah Tho le Zu, CND le Zu kan ti peng. A poi taktak. Illusion long te an si. Hi thilhmanthlak nih a kan chimhmi cu Laimi hi mipaangpar phun kan si rua ti khi a si. Thil hi a ning taktak, a muru taktak, hlai lo in, kawl lo in, a cungpavuan sawhsawh in, kan ruah, kan chim, kan rel, ti a langh caah hi bantuk lungput le nunning hi kan hrial ah a tha.   Tho timi hi cheukhat nih (mithi an tho ) timi zumhnak in a ra mi a si caah, Lawki Biaknak he aa pehtlai tiin an ruah. Lawki Biaknak ah thawhthannak tihi a um lo. Mithi cu an thih hnu ah mithi khua ah an kal tihi zumhning cu a si. Cu caah mithi khua i a ummi minung thlarau  kha Khuavang sin in mithi khua ah an chawnh biak hna i cucu thi tlawng tiah an ti.   Tho timi cu kum a tho than, kum a vui than, kan tho than, kan itung than tiin a ra mi tu a si. Cu caah Tho puai cu Kumtharpuai ( New year Festival ) ti zong in cheukhat nih an auh. Tho puai an tuah lio thla cu Tho thla tiah auh a si i  September thla cheu hrawng in October thla 15 tiang hrawng khi Tho thla tiah auh a si. Tho thla hlan ah Hniang thla ti a um  August thlacheu in September thlacheu chung khi a si. Hniangthla timi cu a hniang   bik, hngakchia bik, a dongh nak, a netnak ti khi a sawh i kum donghnak, kumdihnak ti khi a si. Cu bantuk caan ah hin tirawl hi a chambau cang, tirawl thar a chuahhlan a si i (Licham Tharban ) timi bia zong a um. Chim duhmi cu ( ka li le ka cantiang a dih, ka ti le ka rawl a dih, ka ei awk a dih, a cham, athar, rawlthar ka vun banh, ka phandeuh rih lo ) ti khi a si.  Cu caan ah hawikawn, dawhria, he rawldumnak puai, inuamh hi a sunglawi tuk in hmuh a si bantuk in cu lio caan i puai an tuahmi cu Hnianghrawm tiah an auh.   Cu caah Hniang le Tho timi cu kumrelnak, kumdonghnak le kumtharnak khi a chim duhmi a si. Kan pupa hna nih Thothla a chuakmi khi kumkhat tiin an auh hna nain hngakchiate cu Hniangthla ah a chuah ah cun, Thothla ah khin, thlahnih long a si nain, kumhnih tiin an rel than. Cu nih cun kan pupa hna i kumrelnak a si ti khi a langh ter. Laimi nih Hlukhla, acheunih Thalkut, Capcar Kut an ti i February 20 in March 15 karlak ah puai hi an rak tuah i cucu kumcheu puai a si. Chimduhmi cu kan pupa hna  kumrelnak hi anmah le an ning tein an rak ngei ti khi chim duh mi a si. ( Pa Hlun nih cun ek cik cek in an chimh khawh ko hna lai ).   Hi bantuk in Tho thla ah Buhthar, Sathar, tirawlthar, an vun hmuh tik ah, an ilawm hna i Puai phunphun cu tuah a si. Cheukhat nih, unau chungkhat he siseh, Innpa chakthlang he siseh, Hawikawm dawhria he siseh, Lohrawm Dawhria he siseh, vawk hna an rak vulh chung i, Tho vawk an ti i, Tho puai caan ah an thah, an ihrawm, an ithen, an ei ti. Inn bing in cheukhat nih, Ar khong khi a kum in, an erh, Zabui an erh, Chang an iring, Zupu zong an  i ring, Zusa, vasa tiang, in an khawmh. Kum a vui caah an ilawmhnak kha, puai phun in Tho ni tiah an khiah i nithum chung an hman. Mikip, Innkip, khuakip, vengkip an ilawm, Kan miphun pining in, lawmhnak in a khat, diriamnak le lunghmuihnak in, hnakchia upa thlu lo, kan thinlungchung ah a erh in aa erh..    Kum thar he pehtlai in Mirang phun, hi cu January nikhat, nikhat hmanh a si lo eh, December ni 31 zantim, thu hluk mak in kan ih lio, mang kan manh lio, ah an ilawm. Cucu miphun kan idannak, Laimi cu mirang kan silonak, Mirang cu Laimi an si lo nak, Kan idannak, a langh tertu, hmelchunhnak, a si i cucu  NUNPHUNG kan ti theu mi cu a si. Education timi cawnnak kong a si loh. Dr. Degree kong a si lo. Computer kong a si lo, Khamhnak kong a si lo,  NUNPHUNG timi cu…Miphun kan idannak kong tu a si.   Laimi hi thih a fahsak ngaimi miphun, thi le sa a tleih chan ngai mi miphun kan rak si. Cu caah THI Tirh tihi kan rak ngei. Chim duhmi cu mithi hi kumthum tiang ruah peng, ngeih peng, a rak si. Kumthum tiang hi an tah peng hna, an hlam peng hna, Nu le Va  thihtian a tian mi an si ah cun kumthum chung hi va ngei lo, nupi thi lo in ulh a rak si.     U le nau hna, ruat tuah hmanh uh ? Zeicahdah X'mass caan ah kan chungkhat kan hlam hna ? Kan unau, kan khuami, kan pengtlang, kan hawikawm,he zeicahdah X'mass rawl kan dum ti lai tiin saduh kan thah ? Zeiruang ah ? Zeiruang ah  ???  Aphi cu kan tleihchan hna, kan ngai hna, hmuh kan duh hna, ……A si lo maw ???????   El awk a um lo. A dik mi a si ko. Laimi kan pupa hna zong hi unau chungkhat, thi le sa a tleihchanmi an si ve. Kanmah nak hmanh in an zual deuh ti khawh an si. Hi bantuk in Lothlomi, dirhmun, in Buhthaw, Sahthaw he nuam ngai in Tho caan an vun hman tikah, a thi cia mi , chungkhat kha an vun hlam ve hna. Cu caah Tho ah hin mithi rawldangh ti khi an rak hman. Buh thaw, Sa thaw an chuanmi kha mithi kan dangh hna tiin Inn leng Thengthan ah rawl cu an hunh hna. Tho nih rawl a rak tlanh tik ah mithi thlarau  a si tiin ei law-ei law tiin lungzur ngai in an rak chim. Mithi a rak ngeimi chungkhar hna  zong kha mithi ruak a suangmi bang in an to pi hna, an ngeihchiatnak an hrawm pi ve hna. Tho puai a dih hnu cun an i lungsak ve, mithi an kal cang tiin an i lungsak.   Hi bantuk in Tho hi Lairam pengkip ah an rak ngei cio. Tidim kan unau hna nih Khuado puai tiin, Falam kan unau hna nih Fang Er puai, Dongpui puai tiin Matu kan unau hna nih Minkut tiin anmah le peng le tlang hoih in min an ngei i an rak hman cio. Hihi kan Laimi identity pakhat a si caah Lairam ah Lai Cozah a rak um lio Parlimen chan ah khin Lairamkulh ah nithum zungkhar an rak tuah.October thla Sianginn kharte caan ah khin an rak tuah. Cu bantuk in Lai cozah nih a dir pi tikah kan miphun pi ning in Tho caan a sunlawi ning hi kan tem, kan ton, kan nun pi. Miphun pakhat kan tlinnak a hmual a lang.   1962 kum in kan ram ah Ralkap uk nak aa thawk tik ah Tho caan zungkhar cu a tlau. Khrihfa Biaknak nih le Illusion timi thil um tu ning ruang ah tha pek lo a si I kum 40 reng lo kan rak philh cang. A tu ah a thar in kan vun kawl than mi hi kan miphun caah a tha ngai mi a si caah, kan identity a si mi puai hi sunlawi ter cio awk in forh duhmi cu a si   Kaa lawm. 10/18/09 ------------------------------ "Serve with gladness"

Lai nithla rélnak phun 5

LAI THLA RELNAK PHUN 5 From: Pualva <pualva@yahoo.se> Subject: [Lai Forum] Lai nithla rélnak phun 5, To: Laiforum@yahoogroups.com, Rungcin@yahoogroups.com Date: Wednesday, November 11, 2009, 4:21 PM Lai thla relnak hi aa khat cio lo. Hmunhma le hmuhning aa dan ca ah a si ko lai. A tang hi Pualva nih phun 5 a khomhmi a si. 1-nak (Pu Mang Ceu chimning) Thangkhawng  = January Note  = Febuary Vulvau = March Biangreitlep = April Hlukhla  = May Hniarhno  = June Cileh  = July Sumkanuar  = August Hniang  = September Sikpar  = October Thlaidor lunglen  = November Dipa/ Tho  = December Ref: Phuntungtu, Avoi(12)nak, March 2001. Pu Mang (Mangceu Bawitlung- thakhin@yahoo. com) 2-nak: CACC (Solomon Chum Mang) Hniang thla  ....August Thothla  ..........September Thlazing ..........October Hauka thla........ Novemver Thlahram.... ......December Thlatang.... .......January Phaal thla........ .February Note........ ......... March Nopi........ ......... April Vul thla........ ....May Tan thla ..........June Tun thla........ ...July   3-nak: LAI THLA SIAR DAN (Falam) Meisen  -January Vau       -February Satuah  -March Fangno  -April Thawilak –May Tualbawm –June Tan            -July Fanger      -August Varsar      -September Kut           -October Tharcan   -November Nimkut    -December  K. Lairoham 4-nak: CHIN KHRIHFA MINO HAWIKOMHNAK BU MALAYSIA 2009                     Mr. Jeim Thawng (vanthawngceu@ gmail.com)   1.      Thankhawng  = January  2.      Nohawng       = February  3.      Vaute            = March 4.      Vaupi            =April 5.      Biangreithlep  = May 6.      Pur               = June 7.      Chiapa           = july 8.      Hniang          =August 9.      Zing             = September 10.  Tho              = October 11.  Sikpar          = November 12.  Diapa           =December   5-nak: by Pu Ni Kio Tangkhawng           -January Note                        -February Vau                         -March Vulvau                    -April (Innawng bih thla) Biangreithlep           -May           (Hlukhla) Chumka pur            -June           (    ll     ) Chiapa                    -July Puur                       -August Hniang                  -Septemger Sikpaar   (Hau)      -October Thlaidor  (Kut)     -November Tho         (Tho)     -December Acung vial ah hin Malaysia lei chuahpimi hi nr 1nk dah tilocun dik bik dawh a si. Pualva ------------------------------ "Serve with gladness"

Refugee caah le ramthumnak kalnak caah interview tikah theih ding

Refugee Sinak le Ramthumnak kalnak By Cung Lian Bik   Ni hin kan ram cu Kawl-ralkap uknak chia tangah kan phanh tikah, Laimi kan dir hmun in Refugee sikhawhnak (Refugee status) cu Ramtha (third countries) lei kal khawhnak ding caah Pathian nih lam a kan serpiak mi ngeihchun mi lamkhat te bantuk in mitampi nih ruah a si caah, Refugee sikhawhnak ding caah le Ramthumnak kal khawhnak ding hna caah interview tuah khawhnak caantha nei ve ko na in, a sung mi um pah lengmang a si caah, kan theih a hau mi le kan iralrin thiam ding mi tawmpal te siherhnak he ka van tial. Refugee sinak Refugees le asylum ti mi hna hi Ram pakhat le pakhat an pawm ning a lau lo mi zong a um ko na in, a dantlangpi in(UNHCR pawm ning) Refugees ti mi hna cu a mah a ram chungah a nunnak him lo in, himnak ding caah miram dangah a zam mi hna khi an si. A si na in, misual lai nawng le fir ti bantuk ruangah nunnak a him lo mi hna kha telh chih an si lo. Miphun dan siruangah maw, a si lo le biaknak idan ruangah maw, politic lei ah ruahnak le hmuhning idan ruangah maw, a si lo le a-phuaih-a-sii (organization) pakhatkhat ah itel ruang hna ah ramchungah nunnak him lo in ramdang lei a tli mi hna lawng kha Refugees ti mi cu an si. Hi a si tikah kan nih Laimi kan caah cun Politic lei le a-phuah-a-sii pipi a si mi hna ah riantuan le va tel len hau lo in, mitlawm te a si mi Chinmi kan sinak le krihfa kan sinak, hi pahnih ruang teah hin phungphai a ngei lo mi, Kawlram pumpi uktu Buddhist Kawlralkap hna nih kan cungah an kan zawmhteih, an kan serset ning te hna hi tha te in kan langhter khawh a si ah cun Refugee sawk tikah pek lo awk hrimhrim a tha lo mi a si. Tahchunhnak: 1) phaisa nei nawn hna in UN case ah na tuah a si ah cun, a ruang lo ah na phaisa duh ah ralkap nih phaisa an ka chuah i, CNF he pehtleihnak na ngei an ka ti caah tleih ding sinak in na tuah zongah, cu cu kan miphun le kan krihfa sinak ah hi ti hin an kan thleidan i an kan tuahhram mi a si ti in kan chim khawh. 2)Cun, porter phurh le force labour rian hna tuan ter in, an kan chuih an kan tuk pah ti le rawl zong an kan pee lo kan mah caah riantuannak caan zong kei ngeih lo. Ni khat te dam lo ruangah maw ka tuah/ ka tuan khawh  lo caah tleihding le thawng thlak ding ka si caah ka zam nan ti zongah, hi hna zong hi miphun fate Chinmi kan caah le kan biaknak cungah zei an kan rel lo caah kan cungah zangfahnak an ngei lo ning lei in chim khawh a si thiamthiam. 3) Ralkap nih kan ar an fir i, zia nan fir ka ti hna le an ka velh, fir nan kan puh, ralkap cozah thangchiat tu na si, ti in tlei le khih an ka tim na ti zongah, kan miphun sinak le kan biaknakah krihfa kan si caah an kan nehsawh/ an kan tuah hramhram, hi ti hin a si lo ning in sual an kan kawl ning le an kan serset ning ti in Chinmiphun kan sinak le Krihfa kan sinak ah tlak ter khawh peng a si. Case kan tuah tikah hmual a ngei deuh lai ti in kan ruah tikah politic le party hna ah itel in har deuh in kan tuah i kan buai than ton lengmang. interview ah tha te in kan chim khawh than lo tikah, an kan reject lengmangnak hna hi a si. Zei dang thil lei in a si zongah nan case main point cu hi minority ethnic (Chin miphun) kan si caah le krihfa kan si caah an kan hrem/nek ti in chim khawh peng a si. Hi chungah um zia neih te in kan case kha kan luh/tlak ter pengkhawh a si ah cun reject thiam ding a si lo. Ramthumnak lei Luhnak (Resettlement) Hi ramthumnak lei luhnak ding zongah hin Refugee status hmuhkhawhnak ding ca i a herh mi sinak hna lak ah khin pakhatkhat chungah a tel mi si hrimhrim a hau mi a si. (1.miphun, 2.biaknak, 3.mibu-bukhatkhat chung um sinak, 4 politic ah ruahnak idan ruang hna ah, hi pa 4 chungah pakhatkhat ruangah mah ram chungah a him lo mi, himnak caah miram dang zam mi hna khi refugee cu an si). Cu hnu ah a herh than mi cu, mah chuahkehnak ram ah a kir than kho ti lo ding mi, a kir than a si ah cun tleih le thah ding a si mi a si lai. Cun, a tu a ram hnihnak a um nak ah ram nih a ram ah umnak nawl a pek lo mi a si lai. Hi pin ah hin ramkhat le ramkhat policies an i lawh lonak a um than rih. Ngandamnak kongah le hriamnam-tlai mi hna kong ah. Ramthumnak lei kal cu permanent residence sinak in an mah ram mi sinak (citizen) tiang pek te ding in tinh piak mi a si caah strict deuh ngai in interview tuah a si. Cu caah cun, timtuahnak tha te in interview nan luh hlan in ngeih a hau. 1)      Refugee nasinak proof tuah than a hau. (A cunglei tahchunhnak ah langhter bang khin) 2)      Mah ram ah kir than kho ding si lo nak proof tuah a hau. ( Tck: Tleiding in kawl mi rak sinak, Tleihnak in a rak zam mi sinak, National ID hna neih ti lo caah zei tik poh ah tleih khawh sinak, ram chungah family's name list records a tu le tu check a si ning, milut michuak Laitlang khuate kan si caah theih a fawi ning, luatkhawh a si lo ning ithuhkhawh a si lo ning chimthiam a hau. Cun, laimi caah biaceihnak zung umzia a ngeih lo ning, an mah Kawl ca lawngah Ta-za-zung cu um zia nei a sinak hna chim thiam a hau.) 3)      A tu ramhnihnak ah kan um khawh lonak proof tuah than a hau rih.    ( Tck: Cozah nih umnak nawl/khuasak khawhnak nawl permit pek lonak, riantuan khawhnak nawl ngei lonak, tleih khih khawh peng sinak, athlithup in rian hmuh a har ning, rian neih lo tikah icawmnak ah a har ning, tleih le khih le khuasaknak tuak tikah thinlung chungah thinphang le ngeihchia lung rawk in sinak hna kha tha te in chimthiam a hau.) 4)      Cun chuahkum nithla hei ti pawl zong a kalhkeh sual lai maw ti kha tha te in i ralrin thiam ngaingai an hau. Cun, suimilam pakhat chungte lawng interview tuah in, tha te in tuahkhawh ah cun ram thumnak (ramtha) lei phaisa piakhat hmanh dih lo in kalkhawh ding a si ko caah, kan case cu zingka kan thawh hlan kan hmawcarang in kan si lio zongah an kan hal ah cun chim khawh ding in tha te in timhtuahnak neih ah a tha. --- Source: Zophei Group Mail on 11 NOV 2009 by zcunglianbik@yahoo.ca ------------------------------ "Serve with gladness"

Harnak caan i na der ahcun na der taktak a si

HARNAK CAAN I NA DER A SI AH CUN NA DER TAKTAK A SI (PHUNGTHLUKBIA 24:10)   Biahmaithi: US kan phanh ka ah "Nannih cu mitampi chungin thimmi mitlawmte nan si" tiah kan nu Van Lian nu  nih a rak kan ti tawn. Kawlram harsatnak hmun in vancung khua bantuk ah ruahmi ram hna kan phanh hi cu Pathian thluachuah a si hrimhrim ko. Asinain vawleicung a si rih caah khoika ram i kan um hmanh ah harnak cu a tong ding hrimhrim kan si. Harnak tiin tlang ka taar tikah zeiharnak theng ti sawhmi ka ngei lo. Lungretheihnak, ngeihchiatnak, zawtfahnak, thihlohnak, sifahnak, ningzah hmualphonak, le intuarnak phunphun kong a si ko. Cu harnak hna cu kan ton tikah Khrihfami nih zeitindah kan tei lai ti hi ruahti ka duhmi asi.   A ngaingai ti ah cun harnak cu mizei paoh nih kan in tawn ko. Asinain cu harnak chungin a kan chuahtu, a kan khamhtu cu Bawipa a si. Cathiang nih hi tihin a ti: - Mitha nih harnak tampi a in tawn, sihmanhsehlaw harnak a inmi chung khan Bawipa nih a khamh (Salm 34 :19) - Zumtu hna kha thazang an pek hna i nan zumhnak ah khan fek tein hmun ko u, tiah an forh hna. "Pathian Pennak chung luh awkah hin harnak tampi kan ton a hau," tiah an cawnpiak hna.(Lamkaltu 14 :22)   Cu harnak teinak ah a   thabik cu:   01. Harnak a chuah hlan i hrial hi a si. "Mifim nih cun harnak a rat kha a hmuh tikah hrial khawh aa zuam. Sihmanhsehlaw mihrut nih cun a pahchih thluahmah ko i a hnuah aa ngaihchih (Phungthlukbia 27:12)" tiah kan Baibal ah kan hmuh. Phungthlukbia nih hin zeiruangah dah harnak hi hrial khawh a si a tiah a kan cawnpiak nak cu harnak hi sualnak/thatlonak  ruangah a chuak ti in a hmuh caah a si. Phungthlukbia chungah harnak cu a tanglei ruangah hin a tlung tiah kan hmuh. A tang hi rel hmanh cu sih. - Chimhhrinnak bia zei ah a rel lomi nih amah cungah harnak a tlunter (13 :13) - A hak a kaumi nih a innchungkhar cungah harnak a tlunter (15 :27) - Minung cu a ingchiatnak nih khan dantatnak a in ter tawn. Harnak chungin voikhat na     chuah zong ah na tuah than a hau thiam thiam ko lai (19 :19) - Dinlonak thlaici kha na tuh ah cun harnak kha na zun lai (22 :8) - A zeimaw caan ah cun, kan ziaza i thlen awkah harnak ton kha a herh tawn (20 :30) - Thatlo tuahnak khua a khang lengmangtu cu a min ah Harnak Sertu ti a si lai ( 24:8) - A kaa le a lei aa veng khomi cu harnak chungin aa veng khomi a si (21 :23)   Nihin ah a hlei in chim ka duhmi cu mino hna caah a si. Hmailei na caah harnak a tlun tertu a si lai ti na hngalhmi thil cu a tu tein na hrial cia ah cun teinak na hmuh lai. Mino hi kan thinlung hrimhrim ah zeithil paoh zeidah a lawh hnga tiah va hlat le va hngalh kan duh.. Voikhat cu pakhat pa te lam a leeng an ti. Lampi ah cun ekcaar te aa lamh deng an ti. A hei lonh ah khin a mitsir in a hei hmuh i, ziah a tu kha ekcaar a si lo maw kaa lamh deng tung tiah a ti i, ekcaar a si tak le sitaklo hngalhnak ah tiah a kir hnawh i a kutdong te in ek caar te cu a vun tawh i a hnimh ti si. A kut cu a thu tuk i "Ek bak a si ka lamh lo cu ka van a tha tuk," a ti  an ti (Mi capo chimmi asi). Lamkam ah ek te kan hmuh ah cun ek a si taktak maw si taktak lo tiah kutdong in tawh a rak hau mi a si lo. Cubantuk in Sualnak/thatlonak tampi cu voikhat tuah sual ah cun zeitik hmanhah i ngaihchih awk tha tilo in nunchung a nguhmi a um tawn. Cu ko cu nungak tlangvaal  lio caanah i ralrin a herhmi a si.   Abram Lincoln nih "Mipi nih   an in zumhnak kha na thlau ah cun zeitikhmanh ah an sin in upatnak le bochannak na hmu than kho ti lai lo" tiah a rak ti. Cubantuk in bia zong kan chim sual cangmi cu phalh than a har ngai ngai. Thatlonak zong a chuah hlan i hrial cia khawh cu a tha bik a si.   02. Harnak kan ton tikah Khirhfami i kan hriamnam thabik cu thlacamnak a si. Cathiang nih hi ti hin a kan fial.   -Harnak nan ton tikah lungsau thinfual in um u law thlacam zungzal u (Rom 12 :12) -Nan lakah harnak a tongmi nan um ahcun, thlacam hna seh (James 5 :13) - Pathian cu kan i dornak le kan thazang a si, harnnak caan ah a kan bawm zungzaltu a si (Salm 46 :1) - Harnak a phak tikah ka au u, kan khamh hna lai i nan ka thangthat lai (Ps. 50 :15) - Ka mi hna, Pathian cu i bochan zungzal u! Amah cu kan himnak a si caah nan harnak vialte kha chim dih u (Psalm 62 :8)   Harnak a phak tikah ka au u a kan ti tu Pathian kan ngeih hi zeitluk vantha dah kan si. Voitampi cu harnak kan ton caan ah a ho au hawk hngallo in kan van a sang tawn lo mei? Cu caah harnak kan ton tih ah a herhbik cu kan Pathian i ruaih hi a si. Asinain voitampi cu thla kan cam tikah khawngtawn thlacam kan hmang. Ka thlacammi hi Pathian nih a hna ka tlakpi hrimhrim seh ti kan duh. A sinain kan hal ningin kan hmuh lo tikah kan lung a dong than. Sayakyi Cuai Sang nih "Thlacamnak hi zum hlah u, zumhnak tu in thlacam u" Suhttawngchin ku ma zung neh, zungcichin neh suhttawng ba a rak ti. Thla kan cam ningin a phi kan hmuh lo tikah "Ziah thla ka cam ko tung" kan ti tawn. A si lo. Bawipa nih kan harnak le kan thlacamnak atheih i kan thlacammi nakin kan caah a thabik in bia a khiah, a kan leh ti hi kan zumh khawh taktak ding tu a rak herh.   03. Harnak na ton tikah na u nau chim hrimhrim hna. "U le nau cu harnak i hrawm awkah hrin kan si (Phung. 17 :17). Harnak na ton tikah nangmah lawng i tuarpi hlah. Na unau na chungkhar, u le nau bantuk in na dawtmi na hawikom kha chim hna. Khrihfabu zong hi zumhnak thawngin chuakkhat u nau kan si. Khrihfabu i kan umnak a ruangbik pakhat zong cu kan thilrit i chawn awk le kan lawmnak i hrawm tti awkah a si. Khrihfa hlabu 21, caang 3 nak ah cun:"Ngaihchiatnak kan i hrawm. Thilrit zong kan i hrawm. Khi bantuk Bawipa phung kan zulh. Thluachuahnak kan hmuh cio" tiah kan sak tawn.     04. Jesuh sinah ruahnak kan hal lai. Bawi Jesuh bantuk in harnak kan phisin a herh ve. Bawi Jesuh nih "Ka nawl hi i cawn ve u" (Matthai 11 :29) tiah a ti. Hi vawlei cung a um lio ah harnak tampi a ton  Cu harnak cu zeitin dah a tei hna ti le zeitin dah a ruah ti hi harnak teinak caah a biapi hringhran. Zeithil kan ton i biakhiahnak kan ngeih hlan ah "Hi thil hi Jesuh nih zeitindah a ruah ve hnga?" ti in ruah hmasa i Jesuh nih cu tin a ti hnga tiah zumhmi ning in biakhiahnak tuah ah cun kan lam a tluang bik ko hnga.   Bawi Jesuh nih harnak a ton tikah: - Lungdai tein a ton. A lau lo, a thin a phang lo. - Ralring tein le fim tein a tuah - A tonmi harnak kha a kaltaak lo - A fawinak (short cut) in a phisin ballo. Lamhartu aa thim - Mi zohlo in problem tukha a zoh/hliah i a phisin - Zeitik hmanh ah a sung a khan(surrender) ballo. - A nemnak in a phisin (non-violence) - Thla a cam hmasa   Bawi Jesuh cu Phungbia cawnpiaktu le Farasi hna nih hnahnawhnak an pek tawn. Pa he a  sual lio ah an tlaihmi nu, ngunkhuai peknak kong, tibantuk an hun chuahpi tikah Jesuh nih lungdai tein, ralring tein, nem tein, a tei tawn hna. Moses phungbia in foih an timh nain a nih nih a hmuhmi cu misual nu i a sualnak in chuah dingtu kha a si. Caesar ngunkhuai in foih an timh nain a nih nih cun nan nunnak dihlak hi Pathian ta a si ti tu kha a chimh hna.    Jesuh cu an tlaih lai zan ah thinlungfak ngai in thla a cam. A ton dingmi harnak hi zeitin dah ka tei lai ti a ruat. A duh ah cun Rom ralkap le Tlangbawi ngan ralkap hna zong a tei khawh ko hna. Tlangbawi pawl caah cun Jesuh hi an problem a rak si. Amah hloh an duh. Jesuh ca tu ah cun tlangbawi pawl, Farasi pawl, le ralkap pawl hna kha a problem a rak si lo. A nih i a problem cu vawleimi kan sualnak tu kha a rak si. An nih nih cun an tlaih i an thah, kan tei cang an ti. Jesuh tu nih cun sualnak kha vailam cungah a khenhchih i sualnak nih a chuahpimi sual thawnnak cu vailam cungah a tei. Bawi Jesuh nih hin zeitik hmanh ah surrender a tuah ballo. Teinak a hmuh khawhnak hnga a herh ah cun a nunnak  tiang a rak thap tu kha a si. Nifatin kan nunnak zong ah hin zei hi dah kan harnak kan buaipimi (problem) hi a si ti hi hliah a hau. Hi vawlei kan nun chungah kan ton mi harnak chungah sungh i thih ding hi Jesuh nih a kan duhpiak ballo.   Paul zong nih kan nih cu teitu hna nak in teitu kan si (Rom 8 :37) a ti. Johan 16 :33 chungah Jesuh nih a zultu hna cu: "Nannih nih keimah he nan i pehnak thawngin lungdaihnak nan hmuh nakhnga, hihi kan chimh hna. Vawlei nih hin harnak an pek hna lai, sihmanhsehlaw tih hlah u. Vawlei cu ka tei cang," tiah a ti hna.   U le nau hna, a donghnak ah chim ka duhmi cu kan biatlangtar hi a si. Harnak na ton caan ah nangmah le nangmah i dap law i chek hmanh. Harnak caan i na der ah cun na der taktak a si lai. Cu ti a si caah Bawipa sinah cun thazaang thar la u silaw Harnak teitu si cio hna u sih! Can a ka thia tu lai rel tu bu U pa nang cun ah lung lawm nak tam pi ka nei. thla khat chun ah bawi pa nih lam a kan hroi i tluang te in can A ka hmanh khawt ter fong caah bawi pa min ka than that .Hmai lei ah kan i tawng than te hna lai mang tha nei u... ================= Life is like a book, everyday is new pages

Vui nih a bomhmi hna Hremmi Krihfa hna kong

Hremmi Krihfa hna cu Vui nih an ttanpi hna   From: Siang Kung <siangpahrang@yahoo.com> Subject: [Metkhuabo] Thawngtha thanhchin mi... To: Metkhuabo@yahoogroups.com Date: Friday, October 23, 2009, 9:45 PM Laimi hi group mail pa 3 tal cu kan ngei cio hna.Mah capar arel rih lo mi hna caah...   New Star   October thla thok ka hrawng ah India lei siangin a kai mi ka hawi  pa he online ah kan i tong i bia kan i ruah. Lau leng mang khin sui sui pathian nih saram pawl hman in Hindu pawl a doh nak kong kha na thei cang maw a van ka ti. Ahh! mah cu cu ka theih tung lo. Van ka chim ve tuah theih thlei bak pei si cu ka hei ti. Mail in a van ka forward. Mah mail ka rel tik ah ka pawng kam hawi pawl chimh lo in ka um kho  lo ika van tial chin mi si.   India holh in tial mi India, Mizo lelte weekly news chung ah pathian huhphanh nak kong  thawng pakkhat an van tial. Khrihfa a hrem tuk mi le a nek tuk mi ORRISA, India ram le an pawng kam khua pawl ah a um mi Hindu biaknak bia mi pawl sin ah Khrihfa pathian nih doh nak a tuah ti si. Midialia khua Kahdkamal district, Khrihfa a hrem tuk mi khua 5.08.2009 ni ah ruah lo piin cakei ngan pi an khua chung ah a rak lut I Hindu pa pakhat a van seh. An khua pi in an chuah hnawh i an khamh manh. Mah cakei cu khur rang tak khin a tlii diam ti si. 06.08.2009 ni ah vui ngan ngan pi pi pa 10 an khua chung cun an va lut ve I Hindu pawl inn  vial te  an va hrawh dih.Ruah awk ngai si mi cu Khrihfa inn pakhat hmanh hrawk lo in an lenhta I Hindu pawl in theng theng  an va hrawh  dih. 08.08.2009 ni tu cun vui paruk buu khat palii buu khat tiah buu hnih then in Hindu pawl inn cu fak tuk in an hrawh than. Hindu pawl nih an zaa te in an I bawm I vui pawl cu a phun phun in an thawl hna nain an thawl kho hna lo.   Khrihfa pawl  hi  Hindu pawl nih an rak hrem tuk hna ruang le an rak tuar an rak tih tuk  hna ruang ah ni kum 2008, August thla ni 8, suimilam 7pm. ah an rak zaam bal hna. Mah an rak zaam can he I khat in 2009, August thla ni 8, suimilam 7pm ah Hindu pawl zong cu Vui nih a doh hna ruang le vui ral tih ruang ah an lukkhalo in an zaam ve. 2008 Hindu pawl tuah serh nak cu tu  kum ah an cung ah a tlung ve. Khua ruah har tak tak a si.   Vui hrawh mi khua hi khua 30 si I, inn 1000 hrawng a rawk cang. Minung 20 an thi cang. Aa khawng lo mi pawl hmanh  lung zawt nak, lau nak le lung re theih nak he an khat tiah India lelte weekly nih a chim chih.   Hindu pawl cu an tih, an lau, an khua ruah a har tuk i an prophet pawl le an biak nak I thla cam thiam pawl an va hal hna. An rak leh mi hna cu Khrihfa pawl hi nan rak hrem tuk ruang hna ah an biak mi an pathian nih vui pawl kha do tu ding ah a rak thlah mi hna si tiah an rak leh mi ai khat dih. An pathian sin ah an mah Khrihfa mi ni an nawl lo cun mah vui pawl hi an kir ti lai lo tiah an rak ti chih hna. Cuticun vui cu an karh leng amng I vui 26 tiang an karh cang.   Khrihfa biak inn, inn 500 hrawh nak ah a tang tuk mi Hindu pawl hruaitu Mattan Digal zong cu a cung lei thil si ning ruang ah khamh ai fiang I Mattan Digal in Mathai Digal tiah a min ai let. ORRISA khua um mi Hindu pawl inn hrawk tu vui pawl cu 31,08,2009 le 01.09.2009 ni ah Biraguda khua le a pawng kam khua hme pawl ah an va lut than I Inn 400 an hrawh cang. Vui ral ruang ah a tlii mi ORRISA Hindu pawl caah uktu bawi pawl nih  ral zaam pawl um nak (relief camp) an tuah piak hna.   Acung lei kong hi ka van rel tik ah ka lung ai aww tawm ngai ngai. Ka zuum lo ti nak si lo nain fiang deuh in theih ka duh ziar. A rau lo, ruah lo piin kan chung khat pa Than Hnut ti mi Aizawl ah kum sau khua saa cang mi Rangon ah a rak tlung I a kan riak. A cung lei thawng pang kong  hi na thei ve maw ka van ti. Theih tuk hme the, theih lawng si lo in kei mah bak nih vui nih a hrawh nak khua hna le Inn pawl ka va hmuh ve bak mi si .Alaar tuk mi thawng pang si ko a ti a ka ti.   Acunglei kong he peh tlai in ka lung chung um mi cu, kan biak mi kan Pathian nih bia a kan kam ban tuk in a mi hna cu a huhphanh hna I a khamh peng  ko hna.Pathian nih a hman ah cun saram zong hmual an ngei. A tu pathian nih a hnuu zul ding ah nang mah le kei mah a kan thim ve.Kan mah nih pathian bia heh tiah va  au pi khahw lo hmanh ah kan peng, kan khua chung tal maw si lo le, kan pawng kam tal ah dah thawngtha chim tu pawl thlah nak caah kan chaw va in maw, kan faa le hngak chia pawl khrih he I naih nak ding ah Sunday school saya te hlan piak in maw  si lo le cheu hra cheu khat in dah? Pathian ram kauh nak caah kan si nak nih a phak mi kan tuah khawh ding a tam pi. Pathain nih a kan huhphanh a kan khamh ban tuk in a kan fial mi rian caah tuanvo I lak cio hna usih tiah forh fial buu he………   *Pathian kan lei a tan caah a hodah  kan khat lei ah a tang ngam lai.  Tial Lian Thang 17 Prairie Rose Ct. Gaithersburg, MD 20878 (240-483-5873) www.pathianlelaimi. info ------------------------------ "Serve with gladness"

CIM Sermon "Zonruahnak Thilrit" by William Khen Chum Bik (18 Oct 2009)

Zawnruahnak Thilrit  by William Khen Chum Bik   II Kor 11:28, "Cun a dang cu zeihmanh chim loin Khrihfabu zawn ka ruahnak nih hin nifate in a nenh in a ka nenh."   Caan sunglawi tuk ka hmuh tthan caah kaa lawm. Hi CIM thawngtthabia hi kan hmarngaih tuk tawn ciomi a si caah phungchim tha hmunhma rawltu si sual lai bel ka phang. Tutan cu biapi deuh in Paul nih amah nun bak in zumhnak ah nutling patling lungput le dirhmun a kan cawnpiakmi hi i lak le i cawn kaan sawm hna.   Kan Baibal chung 11:28 veve ah thilrit phun hnih kan hmuh. Pakhat cu Mt 11:28 a si. A thil ritmi in a thil zaangmi sining ah thlen dingin Bawi Jesuh sawmnak a si. A dang pakhat cu II Kor 11:28 , hi a si. Hihi cu a pakhatnak thlennak i a lettalam a si. Bawi Jesuh sinah sual thilrit a tthum cangmi hna nih Khrihfabu thilrit phorhnak lei tu ah i thlen tthannak sining a si. Mt 11:28 ah cun Mirang holh in heavy laden a hman. Keng in phorhmi lenglei thilrit deuh a sawh. II Kor 11:28 ah cun Mirang holh in pressure a hman. Umtthut zalon khawh lonak chunglei thilrit deuh a sawh. Mt 11:28 hi cu taksa mi nih phorh tawnmi mah thilrit a si. II Kor 11:28 hi cu Thlarau mi, Thlarau in nutling patling, nih phorhmi midang thilrit a si. Mah thilrit a tam deuhdeuh tikah khrihfabu, miphun a mui a chia, a zorchuk. Midang thilrit phortu tam deuhdeuh tikah miphun le Khrihfabu aa dawh, a tthang.   II Kor 10-13 hi Baibal thiam pawl nih Biafak Cakuat (Stern Letter) tiah min an pek. Hi chungah hin Paul hi a bia a faak, a celh celh awk ttha lo. Nupi chia bang bianek le bia-eng zong a hman len hna. Tch. Nannih cu Fim tuk u ci kaw, tbk (11:19). Lo lam tlunka thabat par i nupi he i sik lio thinhun bu ttialmi ko a lo. Hihi Khrihfabu dawt ttung lo le minung hawi thilrit khinh huam ttung loin caanttha hngak, mimiak duh, langhsar kawl, lamkaltu deu hna ruangah Paul a thin a hunnak a si. Khrihfabu thilrit phorh loin Khrihfabu thilrit an si.   11: 21 ah, Paul nih mihrut bia zong hmang pah ve ko ning law a ti i Pathian rian a ttuannak cu a hun i porh. Voi 39 tiang tuknak kan huah a ti. (Caang 24) Rawl lo le ti loin voi tampi ka tuar, lungcheh zong ka tong, rianhrang ttuan awk a um tawn, zan it loin ka um tawn, dornak ngei lo le puan ngei lo tiangin ka um tawn, a ti. (caang 25-27) Cu bantuk cu chim loin a ti i a hei chimduhmi cu, cu hna nakin a har bikmi cu tinak si dawh a si. Cucu Khrihfabu zawn ka ruahnak nih nifate in a nenh in a ka nenh hi a si, a ti.   Hi Zawnruahnak ti biafang hi an ttialnak Krik holh in merimna a si i phun thum in leh khawh a si. TEV le kan Lai Bible ah cun Zawnruahnak (Concern) tiah a leh. RSV ah cun Phannak (Anxiety) tiah a leh. KJV ah cun Zohkhenhnak (Care) tiah a leh. Hihi an dihlak an vun i fonh tikah a hrilhfiah a chuak. Khrihfabu zawn a ruah caah an caah a thin a phang peng. Cucaah a um sawhsawh kho lo i a zohkhenh, a humzual, a kilkawi peng, tinak a si.   Zei he dah aa lawh tiah, ka tlanval lioah khual ah sa kan rak zawh. Ka hawi ttha ngai pakhat hi zu a rak ri tuk. Mi kip kha a va nam hna, a va ngiar hna. Cu tikah ka dawtmi ka hawi ttha a  si caah siaremte in ka um kho lo. A zawn ka ruah. Mi nih an velh lai i a cei lai ti ka phang. Cucaah ka zulh peng, ka khalh peng, ka dirkamh peng. A zawn ka ruahnak nih zalong loin thilrit in chun zan hlan a rak ka tuah. Cu bantuk cu a si. Paul nih Khrihfabu kha a zawn a ruah caah, a der lai, a tluk lai, a rawh lai, a phang peng. Cucaah ni fate cu a zawnruahnak le a phannak chungin a chuakmi rian rit cu a phorh peng tinak a si.   Nihin Pathian riantuantu le zumtu cio hi Paul bantukin tuknak huah kan herh ti lo men lai. Ti lo le rawl lo um zong a herh ti lem lai lo. Asinain kan khrihfabu kan dawt ahcun a zawn kan ruahnak nih hin Paul bantukin a kan nenh khawh rih peng ko. Paul bantukin Khrihfabu thilrit nih nenh loin lamkaltu deu hna bantukin Khrihfabu thilrit si cu ttih a nung tuk.   America nih Vietnam ral an teinak hriam hi Meithal le bomb tthattha nakin an ralbawi ngan bik biacahmi a si deuh an ti ttheo. Raltuk an kal laite ah a ralkap pawl a cahmi hna cu, Thil pakhat kaan kamh hna. Thih lo ding luatnak a si lo. Nan ralbawi keimah hi ralram harnak chungah nan hmaiah ka kal hmasa lai. Teinak kan hmuh i America in teinak pangparthi he an kan don tik tu ah cun nan hnulei bik ah kaa thlai te lai, ti a si. Cucu a ralkap caah thazang ttha bik le teinak hriam a si. Cucu nutling patling phorh dingmi thilrit, aa dawhmi thilrit, Paul zong nih a rak phorhmi cu a si. Kan Khrihfabu damnak ah phorh cio kan herh. --- Original source: CIM Sermon on 18 Oct 2008 ================= Life is like a book, everyday is new pages

Laimi kan "THO" Le "ZU"

Tho le Zu From: Salai Bawi Uk Thang <cbthang@yahoo. com> Subject: Re: [Lai Forum] "Tho" le "Zu" To: LAIFORUM@yahoogroup s.com Cc: "Metkhuabo" <metkhuabo@yahoogrou ps.com> Date: Tuesday, October 13, 2009, 5:05 PM Hawi le hna, Nunphung timi hi civilization pakhat adirhkamhtu bik asi tawn i Civilization he ai kalhmi phung cu culture nunphung chung ah ai tel kho ding a si lo. Chim duhmi cu hlaan lio ah Pathian biak awk an rak theih hlaan ah zuu idah cu khuachia khuavaang biaknak hrimhrim ah rak hman mi phung asi i zu an rak hman mi kha an civilization he arak itlaak caah arak herh mi asi. Zu tel lo in biaknak zong tlam arak tling lo. Atu cu Khrih dawtnak tu in kan ram le kan miphun a ceu ve cang. Zu nih hin kan civilization caah tthathnemnak apel te hmanh a pe ti lo i zuu a um lo poh hi pumpaak nih siseh, family cio nih siseh, society nih siseh an duh dih cang. Cu caah zuu hi kan nunphung bantuk i kan ruah rih ahcun aruah zia kan ipalh asi kho meen. Zu nih khoika hmanh ah mithmaittha achuahpi nak a um ti lo. Atu kan biaknak nih cun Khrih kutmui (Efesa 2:10)acuang dih ding, Thiangthlarau biak inn (1 Cor 3:16) bantuk asi dingmi le anungmi raithawinak (Rom 12) bantuk in kan pum le kan nunning hi ahmang ding in akan cawn piak i cu cawnpiaknak ka zumh ko ti ah Baptism aco hlaang mi Mitsuurhaang ding in thlafatin biakamnak atuahmi zuumtu lawng te kan si cang. Cu caah zuu he hin azei ti hmanh in kan nunnak le kan nunphung hi kan pehtlaih ter awk asi ti lo. Kan pehtlaih ter ah cun kan mah saantlaih lo asi ko. Hawi le bang cu asawm in sawm ding asi ti lo. Kan civilization he hrimhrim ai kaih ti lo. Company rian ttuan mi worker nih defect kan hmuh tik ah zeitluk indah kan mithmai achiat. Zuumtu nih zuu kan din tik ah khi nak faak khin Khrih mithmai le zuumtu kan sinak min kan chiat ter. Cu caah Bible hi kan izohchih ding asi ko. THO hi kan miphun civilization le culture le religion he ai tlaak ning te in kan tuah awk asi i aherh mi zong asi. Zeicaah ti ah vulei cung miphun vialte nih an miphun kilkawitu ni le caan pical festive season le Day an ngei dih cio i kan nih zong nih hihi cu kan ngeih ve ding hrimhrim asi. Hi bantuk kan ngeih lo ah cun kan miphun hi atlau ding candidate chung ah aum cia cang tinak asi ko. Hi bantuk ni sunglawi ah hin an nunphung i abiapi deuh deuh poh ttha te i tleem le kenkawi an si tawn. Asinain hibantuk festive day ah kan civilization nih aherh ti lo mi zu kha cehken kan timh ah cun ilaklawhnak thil lawngte achuak ding asi caah lohma kan chuah kho lai lo. Cu caah Tho le Zu hi pehtlaihter ding asi ti lo.A chan asi ti lo. Miphun zatlang biaknak phung he ikalh lo te in kan kalpi ding tu si. Salai Bawi Uk Thang Maryland, USA --------------------------- From: Salai Bawi Uk Thang <cbthang@yahoo. com> Subject: Re: [Lai Forum] "Tho" le "Zu" To: LAIFORUM@yahoogroup s.com Cc: "Metkhuabo" <metkhuabo@yahoogrou ps.com> Date: Thursday, October 15, 2009, 2:16 PM Miphun hawi hna, A caan lio te asi caah tlawmte van ttial chap a hau ti ah ka ruah mi ka rak ttial ta rih lai. Washington DC khuasa Laihritlai hna zong atu lio hi laam kan cawng, hla kan cawng, Khuadang i Lai hla Lai laam athiam mi hna zong kan cah hna i urhsai ngai in THO puai hman kan itim. Ka theih ning ah Pu Uk Ling le Pu Kio Hmung hna cu special quest in sawm an si ti asi.  Hawidang zong ara kho ding poh cu rak kan telpi ding in sawm ding ti si. Fund a phunphun in kawl lio pi asi i Hrawn phu le zawhphu in tuah kan itiim. Atuhi THO tuah ding ah upa deuh pawl cu kan lung atho dih ko hna na in mino nih hin zei si theih asi ti lo i a thlihraan zoh ding phun in an um lio pi asi. Cu caah atu ramdang i kan ihrawm hmasa mi THO puai hi sullam ngei te i kan hman abiapi hringhran. Kan icaih lengmang mi THO le ZU timi kong zong hi icaih lo awk a ttha lo mi asi. Hlaan lio ah Zu tel lo in an rak tuahmi arak si lo cu theih cio asi  ko na in atu miphun thinlung i THO thinglung a um ning le hlaanchan i arak um ning hi ikhat dawh asi ti lo. Atu Khrihfa Phung i ai hruai cangmi Laimi nih Zu he kan tuahmi Puai pohpoh cu kum khat kum hnih hlei kan peh zulh khawh ti lo ding cu fiang tuk in hmuh cia asi. Atu USA i kan tuahmi THO zong ah hin Zu kan tel ter ah cun kum vui lei cu kan tuah khawh ti lai zumh asi ti lo. Zei ruang ah ti ah atu Laimi kan nunphung le Zu hi an i pehtlai ti hrim hrim lo ti a fian cang caah asi. Zei poh hi a hramthok ahri le aruang a hna le asor i zawt ah hin thil hi an fiang khun tawn i Laimi le Zu timi arak ithok nak timi pupa i an chim mi tlawm te in van ihrawm hna hmanh usih. Zu cu theih cio bantuk in THILNU in tuahmi asi. Hlaanlio ah cun THILNU hi Lim-ek lawng in an rak laak ti asi. Lo kalnak, ramvaihnak tibantuk ah Lim-ek an vai ihmuh ah cun an rak ilawm tuk i inn an phaak ah hin sathi luanh te in lomhnak hna an rak tuah ti asi. Zei caah ti ah cu Lim-ek cu an zuat, culture an tuah, changvut ah an zuat i cuticun dong ti lo in THILNU cu an rak ineih khawh tawn caah asi. Zu an sak tik ah an van thlaak lai te ah khin camhfung (meifar fung ai vaangmi khi) thla an camh an camh i Thilnu anphulh ciami Kawm/fathau chung ah an nawk tawn ti asi. Cu ti an nawk lai te i thla an cammi ah cun... "Mi that law, Lai nawng law.. Nu biar phoih law, pa biar phoih law..." ... ti ah biachiakha vialte an chim hmasa ta ti asi. Cu ti cun an zu cu ahong tho, an van din i ari mi pawl hawi he an van isiik, an van ivelh, bia an van ichalh le buainak a hong chuah tik ah khin Zu atuah tu hna cu an rak ilawm tuk i kan THILNU hi thilnu ttha asi. Atak asi an rak ti tawn ti asi. Cu caah kan theih cio awk ah aherh ngaingai mi cu Laimi le Zu hi ahram thok te hrimhrim in mah ti i arak si mi kan si i ihawikomhnak le a tthatnak lei kap i kan ichimpiak mi hi si dawh arak si lo. Zu in ai hawikom mi zong cu pa hnihkhat cu kan um ve sawk ko lai nain mitampi cu zu ruang ah ai si mi, ai vel mi, nuva ai tthen mi, ai that mi, ai hua ai ral mi si deuh dawh kan si ko. Cu caah cun atu ah Miphun pakhat kan sinak Festival dawhte le ttha te in kan tuah lai kan ti tik ah Zu tel ter ve ding i Agenda kan chuahpi mi hi cu asi kho lo rumro khi asi cang ko ti in ruat cang ko hna usih. Bible tel lo zong in a fiang tuk ko hih. Upatnak he, Salai Bawi Uk Thang Maryland, USA   -------------------------------- From: Vanthawng Cung <vtcung@yahoo.com> Subject: [Metkhuabo] Re: [Lai Forum] "Tho" tuah kong he pehtlaiin To: LAIFORUM@yahoogroups.com, metkhuabo@yahoogroups.com Date: Friday, October 16, 2009, 5:45 PM Hawile,   THO hi kan hlam tthan lai ka ti ahcun khua faak deuh in kan tuak a hau. Nai ah Pu Lian Cin nih a thlarau umtuning hmanthlak tling ngaiin a ttial cang kha. Tuchan ah phundang piin  a muisam a hung lang ee, ati kha. A ngaingai ahcun culture cu culture asi, politic cu politic asi, biaknak cu biaknak asi ko. Cawhhrup in kalpi awk a tthami a um, a ttha lomi a um. Cucaah, THO nunphung hi kan hlam tthan seh, kan nunter tthan seh kan ti vekvek ahcun duhsah, duhsah in, sang le ve'ng, chungkhar, pumpak tiangin a thlarau nih a hei hlanh tthan te khawh ding khi i tinh a hau. Atu chanthar tuahning cheukhat zoh tikah a muisam a ttial ngaingai. Khawt ttial hruk chan asi caah maw asi hnga thei hlah. Azeipek siah, a tuahmi nih cun a tanglei pawl tal hi cu ruat chih hna usihlaw a ttha ko hnga.   1. Kawl cozah roh mi a khan-naa sittal in kal hlah seh.   2. Hnianghrawm thlarau hi tthawng seh.   3. Lai chuan ti le rawl duhsak (uu-sa-pee) si seh.   4. Lai nunphung tete langhternak um seh.   5. Krihfa chan asi caah a tak in tuah awk a ttha ti lomi pawl cu 'drama' tal in langhter khawh i zuam si seh, THO drama kan ti ko lai cu.   6. Ahohmanh nih khawt ttial i hruk si hlah seh.   7. Lai zupi hang hi hmuh khawh asi ahcun puai zawhmi nih sample teh khawh awk in um seh. A duh nih teh, a duh lo nih teh lo ding asi ko hnga. Chanthar zu dangdang din le zurit buaibai um hlah seh.   Mah thluk tal kan ruah ttung lo, kan tuak ttung lo ahcun tuah lo a ttha deuh. Kan rak ngeih cia mi distinctive nunphung tete zeitluk in dah kan langhter khawh lai, kan fimtawl tthan khawh lai ti khi kan tumtah awk bik cu asi. Nuamh sawhsawh men lawng cu caan paam sawhsawh ah a cang sual hnga.   Nan phun hawi, Van T. Cung Maryland     ================= Life is like a book, everyday is new pages