CIM Sermon "Zonruahnak Thilrit" by William Khen Chum Bik (18 Oct 2009)

Zawnruahnak Thilrit  by William Khen Chum Bik   II Kor 11:28, "Cun a dang cu zeihmanh chim loin Khrihfabu zawn ka ruahnak nih hin nifate in a nenh in a ka nenh."   Caan sunglawi tuk ka hmuh tthan caah kaa lawm. Hi CIM thawngtthabia hi kan hmarngaih tuk tawn ciomi a si caah phungchim tha hmunhma rawltu si sual lai bel ka phang. Tutan cu biapi deuh in Paul nih amah nun bak in zumhnak ah nutling patling lungput le dirhmun a kan cawnpiakmi hi i lak le i cawn kaan sawm hna.   Kan Baibal chung 11:28 veve ah thilrit phun hnih kan hmuh. Pakhat cu Mt 11:28 a si. A thil ritmi in a thil zaangmi sining ah thlen dingin Bawi Jesuh sawmnak a si. A dang pakhat cu II Kor 11:28 , hi a si. Hihi cu a pakhatnak thlennak i a lettalam a si. Bawi Jesuh sinah sual thilrit a tthum cangmi hna nih Khrihfabu thilrit phorhnak lei tu ah i thlen tthannak sining a si. Mt 11:28 ah cun Mirang holh in heavy laden a hman. Keng in phorhmi lenglei thilrit deuh a sawh. II Kor 11:28 ah cun Mirang holh in pressure a hman. Umtthut zalon khawh lonak chunglei thilrit deuh a sawh. Mt 11:28 hi cu taksa mi nih phorh tawnmi mah thilrit a si. II Kor 11:28 hi cu Thlarau mi, Thlarau in nutling patling, nih phorhmi midang thilrit a si. Mah thilrit a tam deuhdeuh tikah khrihfabu, miphun a mui a chia, a zorchuk. Midang thilrit phortu tam deuhdeuh tikah miphun le Khrihfabu aa dawh, a tthang.   II Kor 10-13 hi Baibal thiam pawl nih Biafak Cakuat (Stern Letter) tiah min an pek. Hi chungah hin Paul hi a bia a faak, a celh celh awk ttha lo. Nupi chia bang bianek le bia-eng zong a hman len hna. Tch. Nannih cu Fim tuk u ci kaw, tbk (11:19). Lo lam tlunka thabat par i nupi he i sik lio thinhun bu ttialmi ko a lo. Hihi Khrihfabu dawt ttung lo le minung hawi thilrit khinh huam ttung loin caanttha hngak, mimiak duh, langhsar kawl, lamkaltu deu hna ruangah Paul a thin a hunnak a si. Khrihfabu thilrit phorh loin Khrihfabu thilrit an si.   11: 21 ah, Paul nih mihrut bia zong hmang pah ve ko ning law a ti i Pathian rian a ttuannak cu a hun i porh. Voi 39 tiang tuknak kan huah a ti. (Caang 24) Rawl lo le ti loin voi tampi ka tuar, lungcheh zong ka tong, rianhrang ttuan awk a um tawn, zan it loin ka um tawn, dornak ngei lo le puan ngei lo tiangin ka um tawn, a ti. (caang 25-27) Cu bantuk cu chim loin a ti i a hei chimduhmi cu, cu hna nakin a har bikmi cu tinak si dawh a si. Cucu Khrihfabu zawn ka ruahnak nih nifate in a nenh in a ka nenh hi a si, a ti.   Hi Zawnruahnak ti biafang hi an ttialnak Krik holh in merimna a si i phun thum in leh khawh a si. TEV le kan Lai Bible ah cun Zawnruahnak (Concern) tiah a leh. RSV ah cun Phannak (Anxiety) tiah a leh. KJV ah cun Zohkhenhnak (Care) tiah a leh. Hihi an dihlak an vun i fonh tikah a hrilhfiah a chuak. Khrihfabu zawn a ruah caah an caah a thin a phang peng. Cucaah a um sawhsawh kho lo i a zohkhenh, a humzual, a kilkawi peng, tinak a si.   Zei he dah aa lawh tiah, ka tlanval lioah khual ah sa kan rak zawh. Ka hawi ttha ngai pakhat hi zu a rak ri tuk. Mi kip kha a va nam hna, a va ngiar hna. Cu tikah ka dawtmi ka hawi ttha a  si caah siaremte in ka um kho lo. A zawn ka ruah. Mi nih an velh lai i a cei lai ti ka phang. Cucaah ka zulh peng, ka khalh peng, ka dirkamh peng. A zawn ka ruahnak nih zalong loin thilrit in chun zan hlan a rak ka tuah. Cu bantuk cu a si. Paul nih Khrihfabu kha a zawn a ruah caah, a der lai, a tluk lai, a rawh lai, a phang peng. Cucaah ni fate cu a zawnruahnak le a phannak chungin a chuakmi rian rit cu a phorh peng tinak a si.   Nihin Pathian riantuantu le zumtu cio hi Paul bantukin tuknak huah kan herh ti lo men lai. Ti lo le rawl lo um zong a herh ti lem lai lo. Asinain kan khrihfabu kan dawt ahcun a zawn kan ruahnak nih hin Paul bantukin a kan nenh khawh rih peng ko. Paul bantukin Khrihfabu thilrit nih nenh loin lamkaltu deu hna bantukin Khrihfabu thilrit si cu ttih a nung tuk.   America nih Vietnam ral an teinak hriam hi Meithal le bomb tthattha nakin an ralbawi ngan bik biacahmi a si deuh an ti ttheo. Raltuk an kal laite ah a ralkap pawl a cahmi hna cu, Thil pakhat kaan kamh hna. Thih lo ding luatnak a si lo. Nan ralbawi keimah hi ralram harnak chungah nan hmaiah ka kal hmasa lai. Teinak kan hmuh i America in teinak pangparthi he an kan don tik tu ah cun nan hnulei bik ah kaa thlai te lai, ti a si. Cucu a ralkap caah thazang ttha bik le teinak hriam a si. Cucu nutling patling phorh dingmi thilrit, aa dawhmi thilrit, Paul zong nih a rak phorhmi cu a si. Kan Khrihfabu damnak ah phorh cio kan herh. --- Original source: CIM Sermon on 18 Oct 2008 ================= Life is like a book, everyday is new pages

Laimi kan "THO" Le "ZU"

Tho le Zu From: Salai Bawi Uk Thang <cbthang@yahoo. com> Subject: Re: [Lai Forum] "Tho" le "Zu" To: LAIFORUM@yahoogroup s.com Cc: "Metkhuabo" <metkhuabo@yahoogrou ps.com> Date: Tuesday, October 13, 2009, 5:05 PM Hawi le hna, Nunphung timi hi civilization pakhat adirhkamhtu bik asi tawn i Civilization he ai kalhmi phung cu culture nunphung chung ah ai tel kho ding a si lo. Chim duhmi cu hlaan lio ah Pathian biak awk an rak theih hlaan ah zuu idah cu khuachia khuavaang biaknak hrimhrim ah rak hman mi phung asi i zu an rak hman mi kha an civilization he arak itlaak caah arak herh mi asi. Zu tel lo in biaknak zong tlam arak tling lo. Atu cu Khrih dawtnak tu in kan ram le kan miphun a ceu ve cang. Zu nih hin kan civilization caah tthathnemnak apel te hmanh a pe ti lo i zuu a um lo poh hi pumpaak nih siseh, family cio nih siseh, society nih siseh an duh dih cang. Cu caah zuu hi kan nunphung bantuk i kan ruah rih ahcun aruah zia kan ipalh asi kho meen. Zu nih khoika hmanh ah mithmaittha achuahpi nak a um ti lo. Atu kan biaknak nih cun Khrih kutmui (Efesa 2:10)acuang dih ding, Thiangthlarau biak inn (1 Cor 3:16) bantuk asi dingmi le anungmi raithawinak (Rom 12) bantuk in kan pum le kan nunning hi ahmang ding in akan cawn piak i cu cawnpiaknak ka zumh ko ti ah Baptism aco hlaang mi Mitsuurhaang ding in thlafatin biakamnak atuahmi zuumtu lawng te kan si cang. Cu caah zuu he hin azei ti hmanh in kan nunnak le kan nunphung hi kan pehtlaih ter awk asi ti lo. Kan pehtlaih ter ah cun kan mah saantlaih lo asi ko. Hawi le bang cu asawm in sawm ding asi ti lo. Kan civilization he hrimhrim ai kaih ti lo. Company rian ttuan mi worker nih defect kan hmuh tik ah zeitluk indah kan mithmai achiat. Zuumtu nih zuu kan din tik ah khi nak faak khin Khrih mithmai le zuumtu kan sinak min kan chiat ter. Cu caah Bible hi kan izohchih ding asi ko. THO hi kan miphun civilization le culture le religion he ai tlaak ning te in kan tuah awk asi i aherh mi zong asi. Zeicaah ti ah vulei cung miphun vialte nih an miphun kilkawitu ni le caan pical festive season le Day an ngei dih cio i kan nih zong nih hihi cu kan ngeih ve ding hrimhrim asi. Hi bantuk kan ngeih lo ah cun kan miphun hi atlau ding candidate chung ah aum cia cang tinak asi ko. Hi bantuk ni sunglawi ah hin an nunphung i abiapi deuh deuh poh ttha te i tleem le kenkawi an si tawn. Asinain hibantuk festive day ah kan civilization nih aherh ti lo mi zu kha cehken kan timh ah cun ilaklawhnak thil lawngte achuak ding asi caah lohma kan chuah kho lai lo. Cu caah Tho le Zu hi pehtlaihter ding asi ti lo.A chan asi ti lo. Miphun zatlang biaknak phung he ikalh lo te in kan kalpi ding tu si. Salai Bawi Uk Thang Maryland, USA --------------------------- From: Salai Bawi Uk Thang <cbthang@yahoo. com> Subject: Re: [Lai Forum] "Tho" le "Zu" To: LAIFORUM@yahoogroup s.com Cc: "Metkhuabo" <metkhuabo@yahoogrou ps.com> Date: Thursday, October 15, 2009, 2:16 PM Miphun hawi hna, A caan lio te asi caah tlawmte van ttial chap a hau ti ah ka ruah mi ka rak ttial ta rih lai. Washington DC khuasa Laihritlai hna zong atu lio hi laam kan cawng, hla kan cawng, Khuadang i Lai hla Lai laam athiam mi hna zong kan cah hna i urhsai ngai in THO puai hman kan itim. Ka theih ning ah Pu Uk Ling le Pu Kio Hmung hna cu special quest in sawm an si ti asi.  Hawidang zong ara kho ding poh cu rak kan telpi ding in sawm ding ti si. Fund a phunphun in kawl lio pi asi i Hrawn phu le zawhphu in tuah kan itiim. Atuhi THO tuah ding ah upa deuh pawl cu kan lung atho dih ko hna na in mino nih hin zei si theih asi ti lo i a thlihraan zoh ding phun in an um lio pi asi. Cu caah atu ramdang i kan ihrawm hmasa mi THO puai hi sullam ngei te i kan hman abiapi hringhran. Kan icaih lengmang mi THO le ZU timi kong zong hi icaih lo awk a ttha lo mi asi. Hlaan lio ah Zu tel lo in an rak tuahmi arak si lo cu theih cio asi  ko na in atu miphun thinlung i THO thinglung a um ning le hlaanchan i arak um ning hi ikhat dawh asi ti lo. Atu Khrihfa Phung i ai hruai cangmi Laimi nih Zu he kan tuahmi Puai pohpoh cu kum khat kum hnih hlei kan peh zulh khawh ti lo ding cu fiang tuk in hmuh cia asi. Atu USA i kan tuahmi THO zong ah hin Zu kan tel ter ah cun kum vui lei cu kan tuah khawh ti lai zumh asi ti lo. Zei ruang ah ti ah atu Laimi kan nunphung le Zu hi an i pehtlai ti hrim hrim lo ti a fian cang caah asi. Zei poh hi a hramthok ahri le aruang a hna le asor i zawt ah hin thil hi an fiang khun tawn i Laimi le Zu timi arak ithok nak timi pupa i an chim mi tlawm te in van ihrawm hna hmanh usih. Zu cu theih cio bantuk in THILNU in tuahmi asi. Hlaanlio ah cun THILNU hi Lim-ek lawng in an rak laak ti asi. Lo kalnak, ramvaihnak tibantuk ah Lim-ek an vai ihmuh ah cun an rak ilawm tuk i inn an phaak ah hin sathi luanh te in lomhnak hna an rak tuah ti asi. Zei caah ti ah cu Lim-ek cu an zuat, culture an tuah, changvut ah an zuat i cuticun dong ti lo in THILNU cu an rak ineih khawh tawn caah asi. Zu an sak tik ah an van thlaak lai te ah khin camhfung (meifar fung ai vaangmi khi) thla an camh an camh i Thilnu anphulh ciami Kawm/fathau chung ah an nawk tawn ti asi. Cu ti an nawk lai te i thla an cammi ah cun... "Mi that law, Lai nawng law.. Nu biar phoih law, pa biar phoih law..." ... ti ah biachiakha vialte an chim hmasa ta ti asi. Cu ti cun an zu cu ahong tho, an van din i ari mi pawl hawi he an van isiik, an van ivelh, bia an van ichalh le buainak a hong chuah tik ah khin Zu atuah tu hna cu an rak ilawm tuk i kan THILNU hi thilnu ttha asi. Atak asi an rak ti tawn ti asi. Cu caah kan theih cio awk ah aherh ngaingai mi cu Laimi le Zu hi ahram thok te hrimhrim in mah ti i arak si mi kan si i ihawikomhnak le a tthatnak lei kap i kan ichimpiak mi hi si dawh arak si lo. Zu in ai hawikom mi zong cu pa hnihkhat cu kan um ve sawk ko lai nain mitampi cu zu ruang ah ai si mi, ai vel mi, nuva ai tthen mi, ai that mi, ai hua ai ral mi si deuh dawh kan si ko. Cu caah cun atu ah Miphun pakhat kan sinak Festival dawhte le ttha te in kan tuah lai kan ti tik ah Zu tel ter ve ding i Agenda kan chuahpi mi hi cu asi kho lo rumro khi asi cang ko ti in ruat cang ko hna usih. Bible tel lo zong in a fiang tuk ko hih. Upatnak he, Salai Bawi Uk Thang Maryland, USA   -------------------------------- From: Vanthawng Cung <vtcung@yahoo.com> Subject: [Metkhuabo] Re: [Lai Forum] "Tho" tuah kong he pehtlaiin To: LAIFORUM@yahoogroups.com, metkhuabo@yahoogroups.com Date: Friday, October 16, 2009, 5:45 PM Hawile,   THO hi kan hlam tthan lai ka ti ahcun khua faak deuh in kan tuak a hau. Nai ah Pu Lian Cin nih a thlarau umtuning hmanthlak tling ngaiin a ttial cang kha. Tuchan ah phundang piin  a muisam a hung lang ee, ati kha. A ngaingai ahcun culture cu culture asi, politic cu politic asi, biaknak cu biaknak asi ko. Cawhhrup in kalpi awk a tthami a um, a ttha lomi a um. Cucaah, THO nunphung hi kan hlam tthan seh, kan nunter tthan seh kan ti vekvek ahcun duhsah, duhsah in, sang le ve'ng, chungkhar, pumpak tiangin a thlarau nih a hei hlanh tthan te khawh ding khi i tinh a hau. Atu chanthar tuahning cheukhat zoh tikah a muisam a ttial ngaingai. Khawt ttial hruk chan asi caah maw asi hnga thei hlah. Azeipek siah, a tuahmi nih cun a tanglei pawl tal hi cu ruat chih hna usihlaw a ttha ko hnga.   1. Kawl cozah roh mi a khan-naa sittal in kal hlah seh.   2. Hnianghrawm thlarau hi tthawng seh.   3. Lai chuan ti le rawl duhsak (uu-sa-pee) si seh.   4. Lai nunphung tete langhternak um seh.   5. Krihfa chan asi caah a tak in tuah awk a ttha ti lomi pawl cu 'drama' tal in langhter khawh i zuam si seh, THO drama kan ti ko lai cu.   6. Ahohmanh nih khawt ttial i hruk si hlah seh.   7. Lai zupi hang hi hmuh khawh asi ahcun puai zawhmi nih sample teh khawh awk in um seh. A duh nih teh, a duh lo nih teh lo ding asi ko hnga. Chanthar zu dangdang din le zurit buaibai um hlah seh.   Mah thluk tal kan ruah ttung lo, kan tuak ttung lo ahcun tuah lo a ttha deuh. Kan rak ngeih cia mi distinctive nunphung tete zeitluk in dah kan langhter khawh lai, kan fimtawl tthan khawh lai ti khi kan tumtah awk bik cu asi. Nuamh sawhsawh men lawng cu caan paam sawhsawh ah a cang sual hnga.   Nan phun hawi, Van T. Cung Maryland     ================= Life is like a book, everyday is new pages

Sermon: A THIANGMI THINLUNG by Thawng Peng

A THIANG MI LUNGTHIN By Thawng Peng Lungthin a thiang mi cu lunglawm mi nan va si dah! Pathian kha nan hmuh lai (Matthai 5:8). I. Biadomhnak PCCF chungtel vialte nan sinah Thawngttha chimnak caanttha ka tingco kho ve i, kai lawm hringhran. Nunnak le damnak a kan petu, caanttha zong a kan sersiam piaktu kan Pathian min ka tthangthat. Tutan ahhin Jesuh Khrih nih tlangcung cawnpiaknak (Luke nih cun "hmunrawn" ah a ti – Luke 6:17) ah a chimmi "lungthin thiannak" kong hi i ruahtti hna usih, ti ka duh. Zeica'h tiah cun, minung hi lungthin/thinlung (heart) loin nunkhawh asi lo. Thingkung he kan tahchunh ahcun lungthin hi kan nunnak "muttol/muru" asi, tikhawh asi. Hi Baibal cacaang ka chim tawnmi, mi dang zong nih chim lengmang mi, a common ngai cang mi asi nain, a thar in ruat tthan hna usih, ti ka duh caah ka van i thim tthannak asi. II. Judahmi Nih Thiannak An Cuanhning Judah mi nih hin thiannak hi lenglei tuahsernak – phunglam le nunphung mit (ritual and cultural eyes) rumro in an cuanh. Chunglei thiannak nakin lenglei thiannak ah khan tei an rial deuh. Nuphung hngalh caan thianlonak, fahrin caan thianlonak, tirawl thiang le thiang lo, raithawinak saram thiang le thiang lo, zawtnak thiang le thiang lo, kut ttawl nakin i thianhnak tibantuk pawl hi tor le cheng an ngei. Leviticus chungah khin an um lulh ko. Matthai 5:20 rel chih ding. III. Farasi mi le Phungbia Cawnpiaktu Hna Lenglei Thiannak Farasi mi le phungbia cawnpiaktu saya hna felnak le teirialnak hi cu pumpak minthannak, hmaihngalnak le mi nih ka thangtthat hna seh, ti duh ruangah asi. An thinlung cu a thurhnawm, zir ngeihnak, nahchuahnak, entainak le lih lawngte in a khat. Pathian zong hi a zum ngai mi an i lawhter nain an i bochan taktak lo. Cu an lungthin/lungput cu Jesuh nih a hmuh ziar hna ai. Mi depde le chungthu lengnaal (hypocrites) pawl hi Jesuh Khrih rem lo ci te an si rua; fak lak in ralrinnak a pek hna (Matthai 23:1 – 28). Hi hna pawl bantuk si lo ding hi Jesuh nih a kan cawnpiak (Matthai 6:1 – 34). Pathian nih hin lenglei thianhlimnak nakin lungthin hi a rak zoh deuh hrimhrim ko (1Samuel 16:7). IV. Lungthin Thian Cu Zeidah Asi? "Lungthin thian" timi cu: mi bawmh duhnak lungput, zawnruahnak lungput, thilttha tuah i timh duhnak lungput, thlachiat ruahnak te hna hi an si. A muru hlai ahcun "Amah Jesuh Khrih lungput le nunzia" bantuk ngeih hi lungthin thian cu asi ko, tiah ka ruah (the Christly Purity). V. Lungthin Thianlonak Nih A Chuahpi Mi A. A thiangmi lungthin, lungput kan ngeih lo ahcun kan ram ah, kan zatlang nun ah, kan Khrihfabu ah, kan innchungkhar ah, u le nau karlak ah, nu le va karlak ah, nu le pa le fale karlak ah, rian kan tuannak ah hlawhtlinnak taktak kan hmu kho lai lo. Zatlak puicimhnak a chuak lai. A dam mi miphun kan si kho lai lo. Kan lungthin, lungput a thian lo ruangah kan ram a car, a mui. Kan lungthin, lungput a thian lo ruangah kan i nihter len nain kan nihning a hel. Kan lungthin hi a thurhnawm tuk cang i, ningcang lo rianttuan le biachim hi a phung ah kan ruah cang. B. Lungthin thian lonak nih hin miphun thleidannak a chuahpi fawn. Kan paw a kan khuaitu, nung na thi ah a kan cantertu, cabuai cungah kan kut kan i tlai nain cabuai tang in a kan chuihtertu, Pathian hmai ah zohchia khenhru in a kan nuntertu hi cu bantuk lungthin thian lonak nih a chuahpi mi thleidannak cu asi. Laimi lakah Jesuh Khrih nih a huat tuk mi, mi depde le chungthu lengnal (hypocrites) kan tam ngai cang lai dah ka ti. Cucaah, a thiangmi miphun pakhat sinak lungput he Pathian duhnak kawl hna usih. C. Lungthin thianlonak nih hin nunzia lainawnnak (character assassination) a chuahpi hoi. Laimi cheukhat (ramdang mi zong an si ko lai) hi kan hnabei rumro in mi purhdah kan hmang tawn. Kan theihfian set lomi zong tongkhawn in chim kan hmang ngai. Kan theihmi leng tiang zong in chim kan hmang fawn. Cun, kanmah thinlung mit in mi sumtah kan hmang ngai rih hoi. Anmah hngaan ah cun dawt i thiamter ngai, zawnruat ngai mi zong i lawhter ngai i, mi sinah thlanglamh le mualphoh kan hmang hoi. Cucu, nunzia lainawn (character assassinate) asi, an ti. Cu bantuk a thurhnawmmi lungthin, lungput a ngei mi le thiltuah a hmang mi hna cu Jesuh Khrih nih mi depde (hypocrite) a timi pawl an/kan si. Mah le mah a thiang bik i kan i hmuh lio caan hi kan thurhnawm bik caan asi rua hlah maw, ka ti. Cucaah, mi hi an nung nain kan thither sual hna maw, ti hi ruah ngaingai a hau cang. Zeica'h tiah, mah mit chung hnawmtaam chuah hmasa i tim loin mi mit chung hnawmtaam chuah kan i timh peng ahcun "mah hngallo" an kan ti sual lai. VI. Theology Mit In Lungthin Thiannak An Cuanhning Søren Kierkegaard nih cun lungthin thian timi cu thil pakhat telawng duh khi asi (Purity of heart is to will one thing), a ti. Dietrich Bonhoeffer nih cun lungthin um-ek in Jesuh sin i vai i ap khi lungthin thian cu asi e, ati ve. Micheu nih "interior unification" an ti. Jesuh Khrih hrimhrim nih hin "Bawipa na Pathian cu na lungthin dihlak le na ruahnak dihlak le na nunnak dihlak in na dawt lai," (Matthai 22:37) a kan ti. Cucaah, zeidang vialte nakin Pathian cingcing i thim hi lungthin thian cu asi ko. Ram tthattha a kan phanhtertu, innlo tthatha le mawttaw tthatha a kan petu hi Pathian asi. Amah lawnglawng hi mi khamhtu asi. Khoika kan kal le kan um hmanh ah Pathian nih a kan kil lo le a kan ven lo ahcun a ping a pang kan su ko lai. Kan nunnak nih hin Pathian hi a hlam peng awk asi. Cucaah, Pathian cingcing hi i thim ko hna usih. Pathian kawng te i, i awh hi dawh a hlawkcem ko cu. Kan lungthin nih hin Pathian pakhat te hi i thim hram ko seh. VII. Biafunnak Mitbenh a maw mi he cun thilfiang hmuhkhawh asi lo. Na mawttaw thlalang a mawt tuk ahcun na kalnak ding na hmu kho lai lo. Lungthin a maw mi, a thianglo mi he cun Pathian hmuhkhawh asi lo. Mi tthatnak zong hmuhkhawh asi lo. Zumhnakfek zong ngeihkhawh asi lo. Zumhnak (faith) lo cun Khamhnak lam zong hmuhkhawh asi lo. Cucaah, kan lungthin hi thianter usih law Pathian duhnak kawl hna usih. Pathian nih hin "zeidah tuah hna seh ti a kan duh" timi hi ruat hna usih. Kan lungthin hi Pathian nih uk hram ko seh. Pathian cingcing hi i thim hna usihlaw, a caah hmun serpiak hna usih. Cuticun pei, Pathian cu kan hmuhkhawh lai cu. Lungthin a thiang mi cu lunglawm mi nan va si dah! Pathian kha nan hmuh lai (Matthai 5:8). Note: PCCF Blog archive ) October 2009 ah Original message a um. ------------------------------ "Serve with gladness"

THLACAM NUN: Sermon by Diana Siang Pen

THLACAM NUN   Biadawmhnak Tuzing caan ah nan nih he thawngttha I hrawm tti dingah kaa thim mi Baibal cathiang cu Jeremiah 33:3; "Nan ka auh ahcun kan leh hna lai I a nganmi le a thukmi thil nan hngalh bal lomi hna kha kan chimh hna lai." Biatlang tar ka duh mi cu: Jesuh le Daniel thlacam nun hi cawnttha ngai an si tiah ka ruah. Zumtu hmasa hna nun kan zoh tthan tikah thlacam hi an rawlthaw bik a rak si (Lam. 6: 4). Kan nih chan tu ah hin cun thlacam hi huam le cam ding, huam lo le cam lo ding mi rian pakhat bantuk ah a ruah mi kan tlawm ti lo. Micheu nih thlacam hi biapi tuk ah kan chia ti lo, mah ca cun an chim duh tuk tawnmi bia pakhat cu "zei ruangah hen thlacam lengmang cu a hau (herh)! Kan chim hlan le kan rel hlan in Pathian nih kan duh mi le kan herh mi vialte a theih dih ko" tiah an ti tawn. Mah zumhnak hi a hmaanmi a lo ngai nain ttih a nung ngai mi le zuumtu nun a hrawktu le daithlan zaangzelnak lam ah a kan kalpi tu zumhnak (ruahnak) tthalo ngai a si i a ngaingai ti ah cun cheuchum lawng a hmaanmi (half-truth) a si kan ti khawh. Cheuchum lawng a hmaanmi bia cu lih phunkhat a si kan ti khawh. Thlacam hi khrihfa mi hna kan caah cun abiapi ngaingai mi le a herh zong a herh ngaingai mi pakhat a si. Paul nih Thesalon zuumtu ca a kuat mi hna ah kan hmuh khawh mi cu "a zungzal in thlacam u" (1 Thesalon 5:17) a ti hna. Jesuh cawnpiaknak zongah kan hmuh khawh mi cu "…tukforhnak chungah nan tlak sual nak hnga lo thlacam tuah u" (Luka 22:40). Thlacam hi Pathian he pehtlaihnak kan ngaih lawng si loin tukforhnak ah kan tlak sual nak hnga lo caah le khrihfa mi kan nun ziaza hrim zong a si awk a si. Phundang in kan chim ah cun a nun in kan I nun pi awk (life-style) a si awk a si. Ahohmanh tukforhnak a inglo le a tonglo khrihfa kan um lai ka zuum lo. Thlacam mi le cam lo mi tu mah zawnah hin kan I hliahnak (dannak) a si. Mi cheu nih cun thlacam hi kan duhmi hal caan le chim caan lawngah a ruat tawk zong kan um lai ka zumh. Sihmanhsehlaw, thlacam nih a sawh duh ngaingai mi cu Pathian he I pehtlaihnak nu le va bantukin I pehtlaihnak (intimate relationship) tu khi a si deuh tawn. Efesa cakuat chungah Paul nih thlacam a hrilhfiah rih mi cu kan ral hriamnam tthabik pakhat a si a ti (Efesa 6:18). Cucaahcun thlacam hi khrihfa mi hna kan ralthuam le kan hriamnam tthabik a si bang zungzal in thlacam le lungdong lo tein thlacam hi a theih lawng thei loin a nun hrim in I nun pi hna u si law kan ral a si mi Sehtan hlenthawinak in siseh, Pathian nih Jeremiah chungah a kan kamh bang a nganmi le a thukmi thil nan hngalh bal lomi hna kha kan chimh hna lai a kan ti bang thlacam nun hi thli kan dawp bang or ni fatin ti le rawl kan din kan ei bang biapi ah chia hna u si ti kha tawi te in sawm kan duh hna. Thlacam deuh mi cu zumhnak lei ah an puitling deuh I an nun ah lawmhnak mithmai a leng deuh hrim ko ti hi kei mah pumpak ka hmuh ton mi a si. Biatlangkawmnak Laimi hi theih lei le hngalh lei ah cun kan bau hrimhrim ti lo, amah belte tuahsarnak lei tu ah hin kan chambau ngaingai hna in ka thei, zumhnak ah kan pale a si mi hna nih an chim tawn mi cu kum 100 kan reng ti lo nain kan nun ning tu cu kum 10 kan lo an ti ttheu. Cucaahcun thlacam nun zong hi kan theih nan theih sa mi si ko lai nain sawm kan duh mi hna cu a nun tu in I nun pi hna u si law zumhnak ah nu tling pa tling dirhmun tiang a kan phanh pi hrim ko lai ti zumhnak ka ngei. Korea missionary pa bia kan rak hal bal mi cu, "Korea, hi ti nan tthanchonak a ruang cem (secret) hi na kan chim kho hnga maw? A kan lehnak cu, "thla kan cam tuk ruangah a si ko, cun kan theihmi hnihchunte hi kan I nun pi caah a si ko" tiah a kan leh bal mi nih khua fak ngai in a ka ruahter ve. 2 Chanrelnak 7:14, "ka min in kawhmi ka mi hna nih khan an lung an tthumh I thla an cam I ka hmai kha an kawl I an lam tthalo khan an I mer ahcun, van khin ka run theih lai I an sualnak cu ka ngaihtiam hna lai I an ram cu ka damter lai." Bawipa nih a bia a thar in thlua kan chuah piak hram ko seh. Tampi kaa lawm.   Diana Siang Pen --- Original message is in PCCF Blog (Title at Archive: Sermon 0n 6 Sep 2009)   ------------------------------ "Serve with gladness" ================= Life is like a book, everyday is new pages

Siangbawipa Johnson Bulh Cazin

CHIN BAPTIST FELLOWSHIP OF AMERICA (CBFA) Rev. Dr. C. Duh Kam, Executive Minister 6709 Sandpiper Ct, Frederick, MD 21703 Phone: 301-363-8874/ Cell: 240-626-7389; Email: cduhkam@yahoo. com    August 14, 2009   Dawtmi miphun hawi zumtu hna:   Vawlei cung ram kip in khrihfabu le pumpak tampi nih siangbawipa bulhnak nan van tuah cio mi cungah lunglawmhnak tampi kan ngei.  Hi bulhnak cu Rev. Dr. Robert Johnson fa le nih an hnatlakning tein ngeitu ding sinah kuat a si lai.      CBFA Ngunkeng Pu Mang Cung Nung report August 2009 ning in kan thawhmi phaisa hna cu:   1. Stavanger Chin Church (SCC) Norway = $ 445.97 2. Florida, Petersburg: Laimi sin in = $ 100.00 (a) Van Nawl Lian = 20 (b) Sui Lian Ceu = 20 © Biak Lian Sang = 20 (d) Ni Lian = 20 (e) Sophia pa = 20 3. Chin Christian Fellowship, Newbern = $ 200.00 4. Western Australia CCF = $ 343.00 (Au. $ 480) 5. Milwaukee Chin Baptist Church = $ 200.00 6. Chin Christian Fellowship, Chicago = $ 300.00 7. Calvary Chin Baptist Chuurch, Kentucky = $ 550.00 8. Chin Christian Fellowship, Kansas City = $ 300.00 9. Chin Christian Fellowship (Tokyo) = $ 500.00 10. Chin Baptist Church (Kitchener) = $ 166.58 11. Chin Christian Fellowship, Malaysia = $ 500.00 12. Hriphi khuami, Malaysia = $ 100.00 13. Chin Baptist Mission Church  = $ 2155.00 14. Melbourne Chin Church = $ 1000.00 15. Pu Za Lian, Pu Siang Bik, Pu Tluang Awr (Sweden) = $ 160.60 16. Lai Christian Church, Melbourne = $ 231.00 (Au $ 300) 17. Pu Van Chum Cung = $ 77.00 (Aus $ 100) 18. Chin Agape Church (Germany) = $ 400.00 19. Chin Christian Fellowship (Korea) = $ 200.00 20. New York State, Laimi = $ 178.00 21. Vancouver Chin Baptist Church = $ 645.00 22. Chin Evangelical Baptist Church (IN) = $ 1000.00 23. Pu Sui Dun = $ 45.00 24. Desmoines Chin Baptist Church, = $ 150.00 25. Ngun Er + Thawng Lian + Minlo = $ 50.00 26. Dallas Chin Baptist Church = $ 2300.00 27. Chin Community Christian Fellowship, IL = $ 200.00 28. Chin Christian Fellowship, Sweden = $ 1436.05 29. Pu Za Bik Thang (New Jersey) = $ 100.00 30. Ca Iang (Indianapolis) = $ 50.00 31. Chin Christian Fellowship Denmark = $ 1319.98 32. Chin Christian Church, Syracuse, NY = $ 120.00 33. Rev. Pa Ni Mawng = $ 100.00 34. Chin Baptist Church, Battle Creek = $ 500.00 35. Pu Sang Hmung (TX) = $ 100.00 36. Wellington CCF & Auckland Chin Community, New Zealand = $ 252.56 37. US Lairampar Group = $ 200.00 38. Victorian Chin Baptist Church, Australia = $ 534.00 39. Chin Christian Church, Indianapolis = $ 400.00 40. Amarillo Chin Christian Church = $ 300.00 41. Pu Ceu Uk Thang (Canada) = $ 20.00 42. Lai Christian Fellowship, Singapore) = $ 207.00 ------------ --------- --------- --------- --------- -------- A zapi = $ 18,590.77   Pathian cu bia le tuahnak in aa phuangmi a si.  Santlailo nu Mary chung in Khrih a chuak.  Nazareth khua fate ah a tthang.  Khrih ruangah Bethlehem le Nazareth cu vawlei cung ah khua minthang an si.  A bik in, Khrihfa hna kan caah.  Chimnak le tuahnak hi aa zulh lakmak ahcun sifak santlailo Chin miphun chung in le Lairam bantuk khua fate hna in thil lianngan a chuak kho ko. Miphun le ram ti nak hmanh in a chung ah a ummi minung cungah thil lianngan le ttha cu an um deuh.  Lairam caah Bawipa nih kut tampi a herh. Nangmah le keimah bantuk sifak santlai lo kut te hi a herh mi cu a si ko.  Pathian nih thluachuah in pe cio hna seh!   Bawi Khrih rian ah,     C. Duh Kam Exeutive Minister --- Source: From: Duh Kam <cduhkam@yahoo.com> Subject: [Rung] Lawmhnak To: "Lai Forum" <laiforum@yahoogroups.com>, "Rungcin Group" <rungcin@yahoogroups.com>, "Global Chin Churches" <globalchinchurches@yahoogroups.com>, "Lairam Thanchonak" <lairamthanchonak@yahoogroups.com> Date: Friday, August 14, 2009, 5:47 AM

PATHIAN Tthawnnak: Sermon by Peter Dar Kham

Pathian Thawnnak   Isamuel 17:12-47   Biahmaithi : Minung kan nunnak ah hin thawnnak hi kan herh ngaingai. Thawnnak a herh lo mi a ho hmanh kan um lo. Kan thawnning belte aa phun dang cio hna. A rawlei  a tidin a tha i vitamin a tling deuh mi hna khi an thazang zong a thawng deuh hrimhrim ve. Cucu thazang lei thawnnak asi i fimthiamnak lei in thawnnak, biachim khawhnak leiin thawnnak, zumhnak (Thlarau lei thawnnak) te pawl zong a um ve len.   Goliat nih a vang dir i tluang a khon poh ah hin Saul ralkap pawl cu an tihtuknak ah an ther i an zam dih tawn.(v.24) Israel ralkap pawl hi ralram an kal poh ah hin raithawinak an tuah hmasa lengmang. Abaraham Pathian, Isaac Pathian, Jacob Pathian, kan pupa hna Pathian nih a kan um pi ko ti an theih ko nain cuarpar tanlo mi Goliat an tih tuknak ah hin an ek le an zun tiang hna i ceh dawh an si. Zeiruangah dah hi tluk lawmmam in an tih? An pupa Pathian nih a um pi hna lo maw?   Van le vawlei sertu Pathian nih a kan um pi ko ti theih tung i tihnak a ngei mi zumtu kan um sual maw???? Mi ralchia nih vanram an phan lai lo tiah Cathiang nih fiangtein a kan chimh ko caah (Bia 21:8) mi ralchia cungah Pathian Thlarau a um kholo tinak asi. Pathian nih a kan um pi ko tiah kaa in chimh tung i nunnak taktak nih a tih than mi kan um ahcun cucu hmurkaa longin Pathian a ngei mi kan si lai i nunnak ah Patihan biatak  angei lo mi kan si lai cu a fiang ko. Cucaah ni hin kan miphun chungah hin Biaknak phung kha a leng leiin in fek tein i tlaih i a chung thawnnak taktak kha a ngei lo mi hna kan si sual lai phang  a um tuk hringhran.   David  tleirawl te nih ka pupa hna Pathian nih a ka um pi ko ti kha fiangtein a theih tikah Goliat cu keimah nih ka doh lai tiah Siangpahrang sinah ralthat ngai in a chim ngam.(V.32,37) Tihnak a pel te hmanh a ngeih lomi kha siangpahrang nih a hmuh tikah a khuaruah a har tuk. Asi ne ahcun Siangpahrang a raltuknak thil thuam cu i thuamh tuah an vun ti i an hruk ter tikah a kal pi kho ti lo.(V.38,39) Siangpahrang sinah kaa ziak lo, keimah thilthuam tein ral cu doh ko ning tiah a ti i amah ngeih mi thuam te khan ral cu a doh ve.(V.40) Mah nih ngeih lo mi mah ta a si lomi i thuamh cu mual pho nak asi ko.  "Billy Graham nih Aizawl ah  phung a chim i mipa pakhat nih  a phung chim mi cu record a tuah dih i mah cucu adihlak in biafang pakhat hmanh tlolh loin a zah i phungchim an thiah nak ah a chim than ve. Mipi cu an samfa pakhat hmanh a cawl lo. An mit ku in a lak hna i an i hngilh tak dih. Cu tikah mipi cu a hro hna, zeiruangah dah nan i hngilh dih, nan pianthar lo, mah hihi keimah chimh mi asi lo hih, Billy Graham chimmi dahkaw ka chim cu tiah a ti hna."Billy Graham nih Pathian Thlarau thawnnak in a chim tikah mi tamtuk nih piantharnak an hmuh. Sihmanhsehlaw Billy Graham bia lila cu Pathian Thlarau thawnnak a ngei lo mi nih an chim tikah santlaihnak zeihmanh a ngei lo. Mit kuh nak ah aa cang than. Cucaah Pathian Thlarau thawnnak hi mah nih ngeih tung lo ah cun ningzahnak lehlam asi. i hlan chung khawh asi lo. Corinth Cakuat i holh theih lo kan ti mi khi a ngei lomi caah cun holh khawh asi ve bak lo. Pathian Thlarau a ngei lo mi nih cun a thawnnak cu ngeih khawh asi ve bak lo. Pathian Thlarau a ngei mi nih cun zeimaw tal cu a thawnnak kan ngeih ve hrimhrim awk asi. Zei thawnnak hmanh a ngei lo mi kan si sual ah cun ruah awk tam pi a um lai.    Goliat nih a mah thawnnak a van i bochan i a rak i hro cer tikah a rauh hlanah sungh zatlaknak nih a phanh colh ve. Israel Pathian zeirel lo in bia a chim i a mah thawnnak bochan in aa hrocer i tluang a khon tikah a nungmi Pathian nih rian a tuan colh ve. Lai lei khua te pakhat ah …..pakhat pa nih lo a thlo i a dih dengmang ah tappi kauh tia long a tang. Suimilam pakhat hlanah hei thlawh dih ding khi asi. Cucu a ngol i thaizing caah aa chiah. A hawi le nih ka kuai na lo cu na dih maw an ti i, ka dih dengmang, tappi kauh tia long a tang, thaizing cu Pathian pasarih hmanhnih ka tlaih hna sehlaw an ka tlaih kho lai loh, ka dih diam lai a ti hna. Thaizing cu a hung chuak i lo thlawh cu a vun i thawk. Belh pakhat te tlaih a vun timh ah khin rul nih a kut ah cun a cuk i a nun chung lo cu a dih kho ti lo. Pathian min chalh in biachim te hna hi tih an nung tuk. i ralring lo in kaa chungin a chuak mi poh chim sawhsawh hi mual pho nak asi fawn.   Goliat hi a angki, a bawngbi, a kuthrolh, a kedan, a luchin, a tangphaw te hna hi thir longte an si dih. Cuai a zaza in an rit. A fei hmanh hi cuai 15 a rit cang. A hmai fang te long hi langh dawh asi. Hi ti in zohnak in cun a him taktak ko. Zeihmanh nih tongh khawh ding cu asi hrim lo. Amah thawnnak aa bochan mi hi a mawh ve hrim lo. Sihmanhsehlaw Pathian Thlarau nih a um pi lo cangah cun a ngeih mi hriamnam hi a mah thihnak ah aa cang than ko. Goliat hi pe 9 a sang i David cu zu thah in a thah ding khi asi. Samson zong kha Pathian Thlarau thawnnak nih a kaltak cang hnu ah cun a hmasa I a thawnnak vialte nih a kaltak dih ve cang. Minung ruahnak in cun David nih Goliat thah lai hi cu a si kho lo mi asi. Sihmanhsehlaw IJohn 4:4 ah "Zeicahtiah nan chung I a um mi Thlarau kha vawilei mi a si mi hna chung I a  um mi thlarau  nak in a thawng deuh" ati. Pathian Thlarau thawnnak nih David a um pi tikah cun teinak nganpi a pek. David nih a ngeih mi te kha Bawipa nih a hman piak tikah teinak a chuah pi.   Cucaah kan ngeih mi te kha Bawipa nih hman a duh peng ko. Mi ta i hlan chom hi mualpho nak asi ko. Kan ngeih lomi kha a ngeimi bantuk in i um ter zong hi mualpho nak asi ve. Pathian Thlarau thawnnak cu kan fim kan thiam kan thawn kan ngeih ruangah siloin a mah Pathian he kan I pehtlaihnak cungah aa hngat mi asi. Zumtu pakhat cio kan cungah hi tei nak hi a um ding hrimhrim asi. Zumtu pakhat cio nih kan thawn ah cun Khrihfabu pi cu thawn loin a um kho hrim hrim ve lailo. Zumtu cio nih zeiruang ah dah hi Pathian thawnnak hi kan ngeih khawh lo?????? David tluk, Samson tluk, Paul le Peter tluk in kan va thawn khawh lo hmanhah zawmaw tal cu kan ngeih ve hrimhrim awk asi. Maw Bawipa, pumpak cio, Khrihfabu cio nih na Thlarau thawnnak, revival kan herh ko...   Bawipa nih thluachuahnak kan pekpiak ko seh………….Amen.   Peter Darkham Thangngan Indianapolis --- Original source: CIM group mail (thawngtha@yahoogroups.com) on 09 Aug 2009 ------------------------------ "Serve with gladness"

PATHIAN BIA le KHRIHFA NUN

Pathian BIA le Krihfa NUN                                           (Heb 4:12-13) Pathian bia cu a nung i a thawng, kap hnih har vainam nak in a haar deuh. Hlanglak in a cheukhawh, nunnak le thlarua an i tonnak tiang, hliahcang le thlik an i tonnak tiang a cheu khawh. Minung lungthin duhnak le ruahnak vialte kha a hngalh dih…. A voi (2)nak Vawlei ral (World war II) a donghnak lei ahkhan aa komhmi ram or attanti mi ram hna (Allies) hna nih Japanese kha Ral surrender tuah u tinak ca an rak kuat. Japanese nih an rak leh mi cu Mokusatsu timi biafang pakhat te hi a si. A sullam cu zei rel piak lo/daithlang or itheihter lo (to ignore) ti nak a si. Japanese nih an chim duh mi taktak cu "surrender kan tuah duh lo, biaceihnak kan ngei khawh hnu lawngah bia kan chah khawh lai ti a si. Cu ti men in ral ngol ding cu an rak duh bak ve lo. Nain aakomh mi (Allies) ram hna nih Mokusatsu timi sullam an rak theih ning cu surrender kan tuah lai tin an rak theih. Cu khawhcun Japanese doh an rak itimh mi; an ral hriamnam, meithal le bom hna cu an lakthan dih, an ngol than dih i, vawlei 2nd ral a rak donghnak chan cu a si. Cucu nihin nitiang vawlei pumpi doh ralnak um ti loin dai tein kan umnak hi a si. Chim duhmi cu biafang pakhat te hmual a ngeih ning le a thawngning hi a si. Hi mokusatsu timi biafang pakhat te nih hin vawlei cungpi deihnak le remhnak a kan pekkhawh bantuk in khatlei in ruahthan ahcun minung tampi nunnak millions in a rak lohter khawh i harnak a rak pek khawh hna ti hi a si.   Bia hna hi an thawng i ruahchanhnak a kan pek tu le a lakthan kho tu zong an si. Lawmhnak a kan pek tu a si bantuk in ngeihchiatnak pe tu zong a si ve. Thinlung man lakin a nemtertu zong bia thiamthiam a si. Cu hmanah minung bia cio cio ah dawtu/mi bia cu zeidang nakin a thawng deuh i zeidangnak in a thlum deuh ti zong a si fawn.. Minung hi bia nih a kan siter/tuahter (effect) a kan tuah peng. Cun  vawlei cung sining nih a ngeihmi thlichia, ttotho hna, lihnin, tilian hna le minung nih serhchommi; tlanglawng engine (locomotive) le atomic bom tbk hna a thawngmi an tampi ve ko nain Pathian bia tluk a thawngmi an um lo ti hi kan Baibal nih a kan fianhter. Cu caah Pathian bia hmual a ngeihnak hi Khrihfa kan nunnak ah kan lam hruaitu a si ahcun kanmah zong a sunparnak caah hmual kan ngei ve lai i, kan tuanhawlnak kan itimhtuahnak ah kan hlawhtling ve ko lai.   Pathian nih lam akan hruai nak ding caah a biathiang ningin nun kan herh. Phundang in chim ahcun Pathian lam hmuhsaknak cu a biathiang ruahnak hngalhnak le zulhnak ah a um. Sam catialtu pa cu Pathian bia hi a nunnak lam hruaitu a si; Na bia cu ka ke caah meiinn a si, ka lam ah ceunak a si" (Slm 199:105). Unau hna, Pathian bia lamhruainak cu khua awngpemnak a si, a nomh i lam a tluang zungzal fawn. Cuka ahcun himnak le nunnak tak cu a um. Harnak horkuang chung le muinak lam ah a kan kalpi bal lo. Thluachuahnak le khamhnak lam a si. Pathian bia cu zumtu hna caah lamhruaitu lawng siloin rawlthaw bik zong a si zungzal awk a si. Pathian bia nih zeitindah lam akan hruaikhawh lai? Abia thiang chunzan in kan ruah, rel(Jos 1:8) ahcun cu nih cun lam a kan hmuhsak ko lai. Pathian nih a hruai lomi miphun cu ningcang loin khua an sa. Chicago Statement ah atel ve mi bia pakhat cu Kan biakmi kan Pathian cu a hmanmi Pathian a si i a bia hi a minung hna dihlak nunnak laifang a si" ti hi a si. Pathian nawlbia a zulmi cu lunglawmmi an si (Phut29:18). Pathian sin a panh mi poah cu abia nih fim a chimh hna, a cawnpiak hna i, a hmanmi lam ah a hruai peng ko hna (Slm 48:14). "BAWIPA nih, Na zulh awk hnga lam kha kan hmuhsak lai, kan cawnpiak lai i lungthin kan cheu lai  a kan ti. Kan tuahmi poh le kan zulh awk hnga lam vialte hna cu Pathian hmai ah a lang dih hirhiar ko. Kan pa Pathian ruahnak cheunak le hruainak cu a tha i, zumhawktlak a si zungzal. Cun boston nih Pathian bia nih a leng leiin a kan cawnpiak i, thiang thlarua nih a chung leiin a kan cawnpiak a ti ve . Solomon siangpahrang nih Ka fapa ka bia hi i chingchiah hna law ka nunning hi izohchunh tuah tiah a ti (Phut 23:26). Thawnnak (power) a ngeihmi hliahcang le thlik an itonnak tiang a cheu khawh mi Pathian biathiang hi nifa kan nunnak ah nawlngei bik mi le kan khuaram cuannak hmanthlak (road map)/lam hmuhsaktu si ter izuam hna u sih.   A reltu nan dihlak cungah pa Pathian umpi lamhruainak um ko seh.   Van Cin Thang UTS/PUC --- Original source: Lai Forum mail on 6 August 2009 ------------------------------ "Serve with gladness"

ZIT Sermon by Saza Ceu Mang

ZOPHEI INTERNET THAWNGTHA        9th August, 2009   Caantlai tu               :  Ral Hup Thang   Thawngtha Chimtu  : Saya Ceu Mang (Norway)   A ni                          : 09 August, 2009 (Sunday)       Zungzal nunnak hi thih hnu pinlei caah maw ruat sual lai ci!   Baibal relnak Jesuh nih Martha cu ,"Keimah hi thawhhtthannak le nunnak cu ka si.. Keimah a ka zummi paoh cu a thih hmanh thi hna sehlaw a nung tthan lai; Cun ahohmanh nung i keimah kha a ka zum mi cu an thi bal lai lo, Hihi na zum maw?" a ti.John 11:26   Biahmaisa: Hi bia hi Bethani khuami Mary le Martha an ta, Bawi Jesuh hawi, Lazaruh thih ah Jesuh le Martha an biaruah a si. Hi hna inn hi Bawi Jesuh a phak tonnak le a din-eitonnak a si. Aa daw ngai an rak si caah Lazaruh thih an chimh ah a hnarno a tam i "Jesuh cu a tap." Joh.11:35 thluahmah ve. Baibal cang a tawi biknak zon a si.Hi zon ah hin atutan kan zapi ruah ding ah char ka vun duhmi cu "Keimah kha a ka zummi cu an thi bal lai lo" timi Bawi Jesuh pumpak nih a chimmi "Zungzal Nunnak" kan ti lengmang mi hi zei tik in dah thawk a si ti kha ruahti ding ah sawm kan duhmi hna a si.   Baibal umtuning:         Thawngttha tialtu pa li lak ah Johan hi a bia lak a dang ngaingai. Jesuh chuahkehnak le hrinsor a langhterning zong phun dangpi a si. Pathian nih zeizong vialte a ser lio ah khan bia cun rak serkaw kha bia kha Jesuh in a lang, minung hawi he khua a run sa a ti. Cu bia cu Logos timi biafang a hman rih hoi. Cu lio vulei fimnak in minthang a simi hna Greek miphun hna nih "hngalh lomi pathian" kha Logos an rak ti, Ralttha ngai in Greek mi hna hngalh lomi pathian nan timi hi "Khrih Jesuh" pei a si ko cu tiah hlangfang te in a rak langhter rih.   Johan nih Jesuh kong a chim duh bikmi cu zungzal a hmunmi a sinak, hram thawknak le donghnak a sinak, thawhtthannak le nunnak a sinak le zungzal nunnak a sinak kha fiang tein a langhter. Cu zungzal nunnak kan timi cu thih hnu pinlei ah kan rauthla rih va tep te ding si loin atu kan nun hi zungzal nunnak ai thawknak a si i thih hnu pin lei tiang pehdingmi nun, vancung khua nun, Pathian pennak nun a si kha fiang tein a kan chimh. Thawngttha ttialtu dang he a dan khunnak cu zei thil paoh hi thil fa te tiah ti sawh hlah uh! i biatak uh! Thlarau in khat peng uh! a zei zong paoh ah thlarau biatak a herh hi! ti kha a langh ter..   Kawl le Chin miphun nih thih hnu pin lei kan rak zumhning:         Miphun kip nih thih hnu pin lei kong ah zumhning i ngeih cio a si. Kawl, Budist pawl nih, "kan thih hnu in a nungmi saram pakhat ah kan va nung tthan lai, kan nun lio ah thilttha kan tuah ahcun kan thih hnu nun kan vapeh tik ah minung in kan kir tthan lai, misual mittha lo kan si ahcun tholung, cangcel ti bantuk saram fihnung ah kan kir tthan lai, nunnak hi a hel lengmangmi a si, kawl holh cun (Bawah Tantaza le di) ti a si, thlarau kan ngei lo, mithi khua an lo," tiah an zumh.   Chin miphun tu nih cun, "minung hi rauthla kan ngei tiah kan rak zumh. Kan thih tik ah kan rauthla cu mithi khua ah a va um lai, mithi khua hauka in mithi kutka cawng Sanu nih a rak kan don lai, a nun lio ah khuang a cawi, cakei a fim i puai le laam tampi a tuah khomi hna, sa tampi a kapmi hna le mittha mifim hna cu Sanu he mithi khuami hna nih khuang he dar he an rak don hna lai," ti a si. A nun lio ah mitthalo, miziachia, sifak santlai lo hna cu Sanu nih mithi khua luh a awnh hna lo caah horthuk le lungpang in mikhua khua luh an rak izuam ve ton ti a si, sualnak ngei lo ngakchia cu pardawh rimthaw a hnimhter hna i dai tein a tlim hna hnu ah mithi khua a luhpi ton hna tiah rak zumh a si.   Chin pu pa chan ahcun a thi le a nung an rak i tlawngton, Zawltling le Nganbawm tuanbia hna zong kan ngei. Khuavang sin hna in bia le hla he an rak i chawn ton ti a rak si. Kan hla cuang hna ah "rauthla nih kawl len seh mi nunnem kha" ti hna kan rak ngei. Cu leng ah kan thih cangka in kan rauthla cu kan mihring he aa then, thihnak ri kan phak cangka kan mihring he aa then caah cu rauthla nih cun mi a va tthih ton hna, cucu muthla tiah rak zumh a si. Thih loin a nun tthan ahcun a pum le a rauthla aa then caah kawmh tthan a hau tiah rak zumh a si caah thlathluah (sati lonh in) hna pupa chan ah an rak tuah ton. Chin miphun nih thih hnu umnak khua kan ngeih le rauthla kan rak ngeih kha fiang tein an rak i hngalh cang.   Pupa zumhnak le Khriafa cawnpiaknak a rak i lawh ngaimi nih foi tein a kan thlen:             Khrifa zumhnak tungtlang le Chin pupa zumhnak cu a rak i naih ngaingai. Minung hi thlarau kan ngei ti fiang tein Khrifa cawnpiaknak ah a um ve. Thih hnu pinlei nun va peh ding zong thlarau in peh a si ti ah kan  i khat. Sanu ai ah Bawi Kri nih zungzal nunnak vanram in a kan don lai tiah cawn piak a si fon. Chin miphun zumhning zong ah mithi khua hi hmunhma ngei in a um tiah rak zumh a si, Khrifabu chung ah hmunhma in a zum kan um ve, Pogetry a ti na, hell a ti na, vancung khua a ti na kan si. Nun lio ah midang hna caah nun a siang i puai le laam tampi a tuahpiakmi hna le mittha cu Sanu nih lunglawm tein a rak don hna bang in khrifa mi zong nun a nem i lung a thiangmi le midang hna caah nun a siangmi hna cu vancung penak cu anmah ta ah ruah cia a si ve tik ah aa rak i naih ngaingai, tampi a um len rih, cu caah caan tawite kum zakhat chung ah 85% khrifa ah kan i thlen khawhnak hi a rak si.   Khrifabu hna nih thih hnu pin lei kan zumh cio ning:         Khrifami hna hi Pathian pakhat cu kan zum cio nain thih hnu pinlei kan zumhning ah a rak i dang ngaingai. Leitak khua um khrifabuu lawng in ka vun chim hmanh lai. Zophei peng ah Leitak cu khua hlun bik le ram uk bawi nih rak hruai hmasami khua a rak si ko nain atu ah santlai lo bik lei ah kan i tel cang. Khua thum ah kan ichuah leng ah khrifabuu lei zong in zumhning aa lo bak lomi phu thum, li kan um. Zophei mitam deuh cu Leitak lei nan kan palpah theu lai sikaw kan nelrawnttha a langhnak laampi, Hmongtlang le Leitak kar ah lungdonh nan hmuh lai. Cu lungdonh ahcun "Kan pi a nih cu hellram ah a din cang" tiah a tialmi lungca nan hmuh lai.   Jehovah Witness phu zumhning a si. Hell ti cu baibal ning in thlanmual ti a si.. Mi thi vialte cu an thihnak hmun ah an um dih lai, ni hmanung bik ni, Bawi Jesuh a rak ttum than tik ah an thihnak hmun in an thlarau a rak tho than cio lai. Tu le meheh a then hna lai, Zungzal nunnak a co lo dingmi hna cu an thlarau zei tik hmanh ah a tho ti lo tiah an zumh. Baibal chung bia te an lak ve, nan i palh ti khawh a si lo. Cu ve bantuk in RC zong mithi khua a um tiah an zumh. Kan pupa hna a thicia mi hna cu pogetry timi mithi khua ah an thlarau a um ti a si ve, cu caah thlanmual tha tein kum tin thianh a si. Cu hna thlarau caah Father hna nih thlacam piak rih a si ti a si. Bawi Jesuh a rak tum than hrimhrim lai, biaceihnak a um hrimhrim lai, tuu le hmeheh a tthen hna lai, tiah an zumh ve. A palh kan ti kho hlei lo.   Protestant pawl kan zumhning:         Protestant zumhning cu kan baibal cangthim bang in atu kan nun hi kan thih tik ah kan pum cu lei dip in ser a si bantuk in leidip ah a kir lai, Amah Pathian nih a kan pekmi nunnak thaw,thlarau tu cu a thi kho ti lo, Bawi Jesuh he nun a va peh lai, hell a um lo, pogetry a um lo, mithi khua zong a um fon lo, Krih he vancung khua ah kan leng tti lai, a thicia kan pipu kan ton hna lai, ti a si. Ni hmanungnak ni ti cu pumpak pakhat cio caah a si, a buupi in ton caan zong a um kho ve ko, Bawi Jesuh cu a ttum cang, a ttum lio lengmang, a ttum rih lengmang fon lai, na vulei caan a tu zong a dong kho, thaizing, hmaizarh, kumvui, a tuhnu kum 50 zong ah a dong kho, timhcia in um kha nangmah rian, vancung khua cun a kir mi an um rih lo ruang ah khuazei ah ti kan thei lo nain Khrih he nun tti a si caah khua zei paoh um zong ah a nuam lai, pradis bantuk a si lai ti a fiang.  A tho i Khri he nun a va pehcangmi hna: A tho cang i Khrih he nun a peh cangmi hna baibal chung ah tampi an um len, pa hnih thum in kan langhter hmanh lai. 1.      Peter, Jeim le Johan hna he tlangpar an kai i Jesuh muihmai aa thlen lio ah Moses le Elijah he an hmuh tti hna, hi pa hnih hi thihnak in rak tho hna hlah sehlaw an hmuh tti hna hnga lo. 2.      Mirum pa le Lazaruh kong ah mirum pa nih hel chung in Abraham le Lazaruh kha van mi hna he vancung khua ah a hmuh tti hna caah Abraham le Lazaruh cu thihnak in an tho cang ti a fiang. 3.      Bawi Jesuh vailam an khenh chih lio ah a pawng ummi pakhat kha "Mah hihi kan chimh, nihin ah Paradis ah keimah sin ah na um lai" a ti. Hi nih hin a langhter mi cu a ttum tthan tik, biaceih te tik caan kha hngah a fial lo.. Nihin ah keimah sin ah na um lai a ti caah kha an nunnak a liam ni ah khan Bawi Jesuh he umtti ding a fiang tinak a si. Biadonghnak: Hi nih hin fiang ngai in a kan chimhmi cu atu kan nun hi zungzal nunak he a va pehmi nun a si kha a si, Bawi Jesuh a zummi cu an thi thiam ti lo ti a fiang. ·         Atu kan nun hi vanram nun, vancung khua nun a si philh hlah usih! ·         Atu kan ttuanmi rian paoh hi zungzal nunnak ah i luhpi ding a si philh hlah usih! ·         Atu kan dirnak vulei, kan umnak inn le kan tlawnnak ram hna hi zungzal nunnak kan thawknak a si kha philh hna hlah uhsih! ·         Cu caah atu na nun, na tuahsernak le na lungput hna hi Khrih he nun na va peh tik ah Jesuh hmai na khap lo sual lai maw! ·         A kal ciami mi hna kan pi pu le kan nupa hna an hmai kan chiatter tuk sual hna lai maw! ·         Vancung khua ah i luhpi dingmi nun kha a tu in thawk kan si cang hi mu! Bawipa nih kan zapi caah thluachuah pe ko seh! Ceu Mang Honorary Pastor IBC, Sandnes, ZBC, Egersund , Norway ------------------------------ "Serve with gladness"

Lai Khawt: Congnak puan hrawhmi a si maw?

LAI KHAWT: CONGNAK PUAN HRAWHMI A SI MAW? Tukar hawng cu Laikhawt kong chimrel ngai a si. Mah le ruahning cio ti a si ca ah ka hun chim ve. Sau nawn lawlaw in ka chim lai.   Kei hi Laithil kongkau ah ka cham bau ngai. Laithuam min hmanh ka thei dih lo. Miphun ka dawtlo cu a si hrim lo. Conlo/canlo timi zong hi a thil le a min ka hliah lo. Lai pupa chan Lai hnipuan ka theihmi cu pa hrukmi ah biar le puanrang (alai fang ah atung zulh in anak tenhmi. Avang lei cu tenhmi a um lo) an si. Hi puan hi kanmah holh in a min "Thangraku" kan ti. Cun lupawng a si rih. Lupawng tling taktak cu dongkua a tling ti a si. Capo zong in chim ttheumi cu hlan Lai pa nih Kankaw ah lupawng ca ah thilthan a cawk ti a si. Dongkua a tling deuh rua lo, tawite a bau rua. Lai pa nihcun "Lu cung paw hma Khongpawng dongkua ma tling bu, cite nga-se' (cuaitan tinak) chap pa" tiah a hal, ti a si.  Pa nih hrukmi angki a um ka thei lo. An ihruk ka hmu bal lo. Hitin pa hruk mi angki kan ngeih lo ca ah Laikhawt hi a chuak i cucu kan buaimi hi a si ko. Nu hrukmi ah hnittial (asen) le Bakaw timi (muici sen in a ttial) angki an ihruk pin ah atu congnak puan hi an i aih chih. Nu nih an tai i an i thuamhmi tthi thluanpi zong a um.   Chim hmasabik ka duhmi cu "hnipuan le kan ifenh-aih ning hi a biapi tuk" ti hi a si. Chim duhmi cu hnipuan kan ni fenh-aih mi nih kan thinlung le nunning zong a kan mersan khawh ngai. Thilpuan ttha aa hruk pengmi cu an thianghlim deuh, an thinlung a sang deuh kan ti ko lai. Zeitipoah in thilpuan a hmang sawhsawh mi cu kan hnawm deuh ve ko. Kan thinlung zong a vaivuan deuh ve ko. Tahchunhnak ah hlan lio cowboy uniform an timi luchin, kedan le hnipuan hna vun ihruk-aih ahcun thinlung phundang in ngeih a si. Nungak tlangval zong nih latest model hnipuan pawl vun ihruk-aih ahcun an thinlung aa phun dang deuh. Anmah lawng si lo in midang thinlung hrimhrim zong aa phundang ko. Pastor le Krifa upa hna nih biakinn chung ah hnipuan an hmanmi le an ihruk-aih ning zong nih khin anmah lawng si lo in mipi thinlung tiang a mersan ko. Cu bantuk tthiamtthiam in Lai thilthuam siseh, Lai thilthuam he aa lo in ser/tuah mi hnipuan hna zong nih kan thinlung a kan sersiam ve. Abik in Laimi kan sinak le kan pupa nih an kan rohmi hnipuan kan ihruk-aihning zong a kan theihter. Kan miphun dawtnak le tlaihchannak thinlung zong a kan ngeihter.   Atu lio suit (Khawt le Tawhrolh sau) timi khi vawleicung mi vialte nih hman dih cio mi (universal dress) a si tiah ka ruah. Ramkip cio nih mah le ram zapi zaran nih hruk-aih mi ngeih cio a si. Tahchunhnak ah Kawlram ahcun hni (nu he pa he) a si. India ah angki fual (nu he pa he) a si ve. Mirang ram ah tawhrolh sau (nu he pa he) a si ve. Kawlmi kan huat hna ca ah le kan miphun kan dawt ca ah Kawl tuahmi an hnipuan hni (lung-zi) kan hmang lai lo ti le tawhrolh sau Mirang hnipuan a si ca ah kan hmang lai ti bantuk ruahnak hna hi practical ah zapi zaran ca ah a si kho lo mi a si.   A ngaingai ti ah, Laiphung le thilri kan ttanh tiah biar kaih a ttha ti maw? Puanrang a lai ah anak in tlangkhat te lawng ttialmi he chuah a ttha ti maw? Nu thilthuam lehlam cu a vaa dawh ngai ko ca ah chim awk um lo. Atu i tawhrolh sau kan hmanbik mi zong hi Lai tuahmi  origin a si lo. Mirang a silo ah midang tuahcia mi kan ilak tthiamtthiam ko.   Hlan thilthuam pawl hi a kil tu in kilven awk a si. Hlan pupa chan i an rak hman mi la siseh, sii an rak hmanmi siseh, an tahning le an ttialning siseh. Hi vialte hi tthate in Lai Nunphung kilvengtu buu nih ngeih/chiah awk a si. A a ti kho deuh nih pumpak le chungkhar level zong in ingeih le ichiah ttha hrimhrim a si. --- Asau pah i tling tein HIKA hin relding a si. ------------------------------ "Serve with gladness"