Mittha mi hna rolung phun cu mi thinlung ah a si!

Mittha mi hna rolung phun cu mi thinlung ah a si! Nai hrawng cu ka khua ruah mi chung ah, kan nu le kan pa a si mi, Sisi Nu le pa, an I tel peng. A rauh hlan ah Australia ah an chungkhar ning in an kal cang lai ti mi thawngpang ka hawile sin in ka theih I khat lei ah, chungkhar ning in Australia ah nuamten khua an sak ding mi cu lomh a um tuk ko na in, khatlei ah an kal tak ding mi an fanau le hna kan sican dinning van ruah zawn ah nu lo ngakttahfa bang heih kan veih ne lai hi aw … tiah kai ti sek len. Cun a dang ka ruah tawn mi pawl le thinlung chung ah a cam ngai mi kong hna zong a tawi nak in ca in ka van ttial ve. Thuro Megazine nih, ( kan pa) Sisi pa interview an tuah mi Philippines ka phak hnu ah ka rak rel bal I a donghnak bik I a biacah mi kha nihin tiang ka philh kho lo. Cu a bia cu a bianing te in ka ttial kho ti lai lo ca ah kai cinken peng rih mi ning in ka van ttial hmanh lai. Cucu - Laimi pakhat le pakhat I dawt le I bomhchanh kan hauh nak; Lamttha a hmu kho tu hna nih miphun ca ah lam sial piaktu ttha kan si a herhnak; Miphun ca ah lam phittu le tthanchonak dawntu kan si lo ding mi kong pawl zong hmual ngei taktak in bia ca in a rak chim. Cucu these ram, ramcar I din ding mi ti thiang a hmu ko na in midang a chim siang lo tu bantuk kan si lonak ding kong zong he a chim I a tahchunh. Hi bia sunglawi hi, kan pa nih, a mah pumpak nunnak le inn chungkhar hrimhrim nih an tuah hmasa I an nunnak nih an langhter. Zeitluk in dah ai zuam I duhsak nak nganpi he Laimi degree sang le cathiam kan um khawhnak ding le kan fim khawhnak ding ah ai zuam ti mi le a zeizong kan herhnak ah, a kan bawm peng tu kan pa a si ti cu kan thinlung chung ah roca bang in ai ttial cang viar mi khi a si ko. Ka Pa Sisi pa hi a ral a ttha, a piatta, a punhlin tuk ti hi an chim peng. Laimi kan pa ciammam bak! Harnak le lungretheih vansannak kan ton can ah kan nu le kan pa sin ah kan ra tawn I ruahnak kan hal, bawmh zong kan hal tawn I a kan bomh, ruahnak zong a kan pek. An thladem tang ah hnangam te in kan um zungzal hna. Kan nu le kan pa a si mi, Sisi Nu le pa te chungkhar hi Laimi kan ca ah (Laimi ca lawng hmanh ah a si lo) heu le dih, tlum le ral an i siang peng. Pathian nih Abhram sin ah biakamnak a ser i a rak ti mi bia cu "You will be the blessing of others" ti mi kha a si i cu bantuk ve in Sisi nu le pa hi Laimi kan ca ah thluachuah kan hmuhnak an si ve hrimhrim. Lai mino tampi kan nunnak a tlangpi in kan zoh ahcun self esteem le self confidence te hna hi kan ngei kho lo ngai I can tampi ah miphun dang sin ah inferiority lungput kan ngei tawn. A ruang cu kan ram cozah uknak politics a tthat lo ruang ah ttih le phannak hna kan rak ngeih peng i kan thi tiang an kan hrawh; kan education le system tthat lo tuk ruang zong ah a si lai; cun kan economics dirhmun hna ruang zong ah an si ko lai. Hi nih a van langhter mi hna cu Laimi tampi tthancho kan herh tuk ti nak a si ko. Cun khat lei ah, harnak phun tampi chung hna in life struggle a tuah ve mi kan si mi hna zong nih kan nunnak hi a sunglawi ter, a haar ter ve i man a ngeih ter ngaingai ve. Kanmah kan i hmuh nak ahcun Laimi kan tthangcho tuk ti hi a si. A tthangcho zong kan tthang cho taktak ko (midang he tahtthimh awk kan va tlak rih lo hmanh ah). Kan u le chan hna, kan pa le chan sining hna an kan chimh tawn mi tuanbia he tuaktthimh ahcun tampi tthanchonak lei ah kan I thleng ve. A hlan ahcun Laimi a si mi hna nih Laimi ka si ti hi mi tampi nih an I zah pi ti a si. A tu ahcun Lai mino hna nih Laimi ka si ti cu kan i uan pi tuk cang. Cucu kan nu le kan pa le hna, miphun an dawtnak ruang ah le an I zuamnak ruang i a thei par a rak si ko. Cun kan pa Sisi pa thawng in, Laimi dihlak, Philippines ah hmai a hngal i hmailei mino hna kan ca ah thazang tampi a kan pek, lamttha a kan hmuh sak i confidence zong a kan ngeih ter. Kan nu le kan pa nih an kan kal tak cang lai.. An kal hnu cun UTS campus pi zong khi, Laimi kan ca ah tthing demduam deuh pi khin a um cang lai ti khi ka mitthlam ah a cuang. A tu, an umnak run inn hna ah khin, laimi kan neh le nang a um kho ti lai lo i neh le nang tthing hna kha nehbuar an kai cang hna lai. Cu hlan bantukin kan chumh kan chuannak kan lungthu tappi hna ah meikhu hna zungzal in a zam mi kha a tu cu ttian hram an i thok cang lai mu ka ti; Kan aw kan an, kan nih kan rak lennak thawngpang hna kha an dai cang lai. Inncar haipi kung tang I lungpherh cung tthut le hawile he duhbia phainak hmun le hma zong kha pang an kai cang hna lai mu ka ti. A sinain kan nu le kan pa a si mi, Sisi nu le pa nih kan nunnak ah chimcawk lo mi influence an kan tuah mi thilttha hna cu kan miphun le ram ca ah ceunak a phurtu le damnak a phurtu a si hrimhrim lai. Laimi phun an dawtnak, an dir kamhnak, an fa nau le an kan zohkhenhnak, duhsak piak nak, bomhnak le dawtnak hna cu an buar kho ti lai lo i a tlau kho ti lai lo. Zeicatiah mittha mi hna an rolung phun cu mi thinlung ah a si i zeitikhmanh ah an ttial cia mi tuanbia ttha kha philh khawh an si ti lo. . Upat pek bu he, Lal Awi, Baguio ================= Life is like a book, everyday is new pages

Ram chungah himnak a tlawm chin lengmang

Source: Laiforum Mail (14 April 2009) Ram chung ah himnak a tlawm chin lengmang Naite ah khan Rangoon ah a ummi ngakttah sianginn le biaknak lei college cheu khat cu Kawl Ralkap Uktu hna(KRU) nih khar ding in order an pek hna, ti asi. Cu lak ah college pakhat cu 1970 thawk in tazawin tein registration a tuah mi asi, tiin theih asi. KRU nih kanhnulei kum hra hlei nga thawk in Krifami le tlangcung mi pawl hremnak le namnehnak an rak tuah mi kha atu ah an hun tthanter  chin lengmang mi asi Kum 2008  December thawk in nihin ni tiang ah KRU nih Rangoonkhua kiangkap i a um mi biakinn  100 leng an khar cang. Pastor 50 hrawng kha pumhnak tuah khawh ti lo ding in biakamnak min an thut ter hna, ti asi.  Cu ti an tuah mi nih Rangoon ah a ummi biakinn 80% kha harnak a pek hna, tiah Christian Solidarity Worldwide (CSW) nih thawng a thanh. KRU nih cu ti a tuahnak a ruangpi pakhat cu; Nargis rili tilet ruangah harnak a tongmi hna bawmhnak ah khan Krifabu  an i tel ca-ah asi, tiah khuaruahar ngai in theih asi.    KRU nih cun Kawlram chungah Kawl miphun pakhat lawng kan um.  Ethnic nationality nan timi "taingzintaa" an um lo, tiah New York khua ah a um mi UN zungpi ah an chimh hna. Asullam cu, Chin, Kachin, Karen, Shan tbk., pawl hi mi phun dang an si lo, Kawl lawngte an si dih ko, an va ti hna.  Laimi nih "unau laihri tlai kan si," kan ti ttheu bantuk hin an nih nih "Tta u ttung sinn, ngi a ko zin kan si", tiah rul nih a meite a hngerh i, zu le va nih rawl ah an ruah i, an rak tlanh sual cangka a dolh hna bantuk khan, a aw-an aa thlum ter i, a thei lo nih i zumh sual ah dolh dih ding in setan ngian in a kan lem mi asi.  Cu kong fiang deuh in hmuh khawhnak cu atu KRU nih an suaimi constitution ah an langhter mi Kawlram puanlang(national flag) thar ah "ARFI' pakhat te lawng an cuanter mi kha asi.    Ram chungah cun Laimi bantuk "taingzintaa" timi pawl zapi kha Kawl holh holh dih ding in le Budit biak dih ding in ciammam tein timhlamhnak an ngei i, cu rul policy cu biatak tein an lo hma can ah an kalter.   Mah kha, Kawlram ah Krifa biaknak hloh i, Budit biakter dih hnu ah Laimi sinak hloh i,  Vaimi siter dih ding in an timh mi cu asi.  Mah kha "Ethnic Cleansing" kan ti tawn mi le "Burmanization" an tuah ee, kan ti tawn mi hna kha an si. Phun dang in chim ahcun KRU cu Laimi cungah "RUL POLICY" a ngei, tinak asi ko.    Laimi cu Budit biami ram ah Krifa kan si i, a hlum tein kan um ca-ah kan Krifa sinak hi kan miphun theihtlei identity ah aa cang.  Kan Laimi sinak le kan Krifa sinak cu tthen khawh lo tiang in aa tlaih-tthup i, fek tein aa sengh tikah Laimi(Chin) vun ti le cangka Krifa asi lai, tiah ruah asi colh bantuk in Kawlram mi ka si, Krifa ka si, vun ti le cangka Laimi asi lai, tiah ruah colh asi.  Cu tikah kan Krifa sinak hloh cu kan Laimi(Chin) sinak ci hloh kha asi ko.   Kum hmasa deuh ah khan kawlrawn ah a um mi fanau le pawl sianginn an up tik hna ah, an Lai min, Tluang Khar, Thla Hre, Hram Uk, timi pawl kha Kawl min ah thleng dih uh, tiah hranhram in an fial hna.  Kha ngakchia Lai fanau le pawl kha an hun upat tik ahcun an Laimin tete kha an philh lai, asiloah zei ah an rel ti lai lo.  An min hram ah "Salai" asiloah "Mai" tete an chiah lo ahcun a dongnak ah cun an miphun Laimi(Chin) sinak zong kha a lo te lai. "Nga Chin ma hoh, a phe Chin phit de," aa timi cazin ah khulrang ngai in an lut te lai.   A cunglei kan chimmi "Rul Policy" kha atu ah KRU cu tazawin cozah an si lo ca-ah thli thup  deuh in an tuah cuahmah ko nain a theimi mit chung ah cun fiang put in a lang ko. Zoh u law, Rungtlang ah vailam tung bunh mi phoih riangmang i, cuka hmun ah phungki lukawng dir ter cu, kan in tei hna, kan in uk hna, kan ke tang ah nan um, hei ti kha asi ko.  Cu cu hlan lio Kawl siangpahrang nih Shan te hna, Mon te hna Rakhaing te hna an rak tuk i, an tei hna tikah tlangbo cungah puanlang tar i, kan tei cang, kan uk cang hna tinak langhternak can ah budit pura an rak sak tawn bantuk kha asi.    KRU lutlai Tang Suai cu a mah le a mah siangpahrang ah aa ser i, hlan lio siangpahrang nih ram a rak ukning sattal in ram uk a duh.  Nepyidaw ah Anawratha, Bazinh naung, Alawng paya, hei ti bantuk hlan Kawl siangpahrang panga hna milem kha sang pipi in a sak hna i, a tar hna kha nan hmuh lai. Bogyoke Aung San bantuk ram a sersiam mi hruaitu hna kha cu hloh khawh aa zuam lai.  Atu ah Kawl tangka caku cung ah saram zuk lawng a cuan kha nan hmuh lai.  2010 kum thimnak kha hranhram in a nam chih te lai i, a dih tik ah cun atu ah  firkhut in a tuah mi pawl hi tazawin in langhngan in a tuah te lai.  A ka nih cun 'democracy' a chim lai.  A taktak  democracy kong a chimmi  hna kha cu a tlaih hna lai i, kum 45 tiang thong a thlak hna lai.  Federal kong a chimmi cu kum 90 leng thong a thlak hna lai.  Cu bantuk in kan hmaika ah thil tampi a tuah kan hmuh ko bu ah zeitiin dah kan zumh khawh ti hna lai. A zeiti hmanh in zumh khawh ding an si lo.    KRU nih 2010 ah thimnak kan tuah lai, an timi hi mah "rul policy" bak cu asi.  An firkhutnak vialte kha tazawin ah an canter lai i,  mifir nih tazawin in ram uk khawhnak lam an sialmi tu asi kha ramchung ramleng khuaza kip ah a ummi Chin miphunpi nih kan theih dih ding ah ka hun phuan mi asi.  Ramleng rian ttuanmi hna nih ram chungah kan kuat mi hnik khat tete hi KRU caah cun an nunnak ca ah thazaang si asi ve.    Cuca-ah ramleng rian ttuan mi hna nih khuazing Pathian nih an zaangfah i, an pekmi Bawipa thluachuah sunglawi asimi nan tangka ngeih mi hnik khat tete kha KRU bank ah chiah ding ah cun fak piin iruat hmasa nan hau lai.  Ziah tiah KRU cu setan ngian a ngei.  Setan rul cu dolh a hmang.  A pelte hmanh zumh awk tlak asi bal lo.   Salai Vantu

EASTER SUNDAY SERMON by Vawkuu

Kan Bawipa Jesuh nih a kan phorhmi Thawngttha Text: Marka 16:1-8   "Sabbath ni kha a dih tikah Mary Magdalin le Jeim nu Mary le Salom nih khan Jesuh ruak thuh awk caah cun zihmui kha an i cawk. Zarhpi Ni zingkate, nichuah kate ah khin, thlan ahcun an va kal. Lam ah cun pakhat le pakhat kha. " Thlan khar lung kha ahodah a kan thawnpiak te lai" tiah an iceih. (Akhar cu lung  nganpi a si). Cun an hun zoh i lungkha a rak i thawn cang.  Cu caah thlan chungah cun an lut i puan rang aa aih i orhlei kam i a rak thumi tlangval pakhat an hmuh i an lau ngaingai. Cu pa nih cun, " Nan thin phang hlah u. Vailam ah an tahmi Jesuh, Nazareth khua mi kha nan kawl ti kha ka hngalh. Sihmanhsehlaw hika ah hin a um ti lo- a tho cang! An vuinak hmun hi  zoh hmanh u…………"   Dawtmi Unau hna, kan phan bal rih lo mi nihin ni zingceidawh nih nang le kei caah thawngttha pakhat a rak phorhmi cu; Kan Bawipa Jesuh Krih cu thihnak in a tho than cang! ti hi a si. Thihnak tei tu kan Bawipa Jesuh Krih min thangthat si ko seh!  Vawlei cung ah biaknak tampi he zumhmi phunphun an um cio. A sinain cu an biakmi pathian hna cu thihnak teitu Pathian an si lo. Kan Bawipa Jesuh cu zultu hna sin le kan sinah bia akan kamh bantuk in nithum hnu ah a tho than! Kan Bawipa Thawhthannak cu kan caah a sungluai tuk hrinhran i, sullam angei taktak. Zeitiahcun Paul nih I Corin 15:17,18 ah a kan ti bantuk in, kan Krihfa sinak le kan zumhnak hi Bawipa Jeush thawhthannak nih sullam a ngeiter caah a si. " 17 Cun Khrih cu thawhter a si lo ahcun, nan zumhnak cu hlennak men a si hnga i nan sualnak chung i nan tlau ko rih a si hnga.18 Cuhleiah Khrih a zummi a thi cangmi zong kha an lo tlau dih ti a si fawn hnga" Cu caah tuzing caan ah kan Bawipa Jesuh thawhthannak nih Thawngtha (Goodnews) akan phorhmi hna lakah pathum hi ihrawmtti kan duh hna.   Nunnak thar Jesuh thawhthannak (Resurrection) ti cu "thih hnu nunnak ngei" ti khi a si ko. Tu Vawlei cung pumpaluk in kan zohtik ah, Easter Sunday timi biafang nak in Resurrection Sunday ti hi mikip nih an hman duh deuh ngai cang. a sullam cu a va ikhah ko hna nain Resurrection Sunday ti hi ka uar deuh ve. Hi nih a langhter mi cu nang le kei zong amah chungah kan um i, Jesuh zong nih kan chungah a nung ve ahcun kan thih hnu zongah nunnak thar pek kan si lai ti hi a si. Cu ruangah Pathian fa a si i, Amah a zum mi poah cu thih hnu nunnak kan ngei ve dih, a thicia mi zong siseh, a thi rih lo mi zong kan dihlak caah nunnak thar petu Bawi a si. A thihnak ah kan thi ve, a thawhthannak ah thawhter than kan si  i Amah nunnak thar kan ihrawm ve. Cu caah Jesuh thawhthannak nih a kan fianhter mi cu vawlei cungahhin voikhat cu kan thih ve dih cio ko hna lai i, a thothan bantuk in thawhter than kan si ve lai. Cun Jesuh he zungzal nunnak kan ihrawm than te lai khi a si. Cu cu nang le kei caah Thawhthannak (Resurrection) sullam cu a si. Thawngtha sungluai tukmi a si. Pathian min thangthat si ko seh!   Ruahchannak thar Kan Bawi Jesuh a rak thih lio ahkhan azultu hna le a nu Mary le innchungkhar hna cu ngaihchiat lungkuai in an rak um. Sihmanhsehlaw cu tin an ngaih a rak chiat tuk lio caan, ruahchanhnak zeihmanh an rak ngei ti lo lio ah khan, a thawhthan nak nih lunglawmhnak, le ruahchanhnak a vun pek than hna.  Dawtmi u le nau hna, nifa kan nunnak ah ngaihchiatnak phunphun, beidonghnak, lungdonghnak le harnak phunphun kan ton cio ko hna lai, sihmanhsehlaw, Nang le kei ruahchanhnak pekawk ah nihin ni zingah kan Bawipa Jesuh a tho than cang! Ngaihchiatmi hnemhawk ah le, lungdongh mi hna ruahchannak pek awk ah nihin Amah a zummi kan pumpak cio ah a nunthan cang. Na zumh ahcun na chungah a nun i, na caah ruahchannak le hnangam deihnak pe tu Bawi a si. Jesuh thihnak in a thawh hnuah Zarhpi ni zingkate ahkhan Mary Magdalin sin ahkhan a lang hmasat bik (Marka 16:9), Mary cu ahawi le kha a chim hna. Nihin ah kan pawngkam ummi kan hawidawt hna cu hi thawngtha hi hrawm ve hna u sih. Beidonghna le reitheih ngaihchat mi hna zong hnem hna uhsih, bomhhna uhsih, dirkamh hna uh sih. Thazang pek hna uhsih. A nungmi, adikmi ruahchanhnak le thih hnu nunnak (life after death) a ngei kan sinak hngalhter ve hna u sih.   Lungrualnak thar Cun kan Bawipa Thawhthannak nih a kan phorhmi cu ruahchanhnak lawng si lo in lungrualnak le idawtnak zong akan phorh chih. Mary le a hawile pawl, le a zultu pawl hna nih hi thawngtha an theih lio ahkhan, pakhat le pakhat cungah an lung aa lawmh i, lungrual te in mikip sinah hi thawngtha hi an rak aupi ti kan hmuh. Cucaah u le nau hna, Pathian a zultu le a zumtu kan si bantuk in, kan umnak cio te ah lungrualnak he pakhat le pakhat cungah dawtnak ngei hi nihin nizing ah Jesuh thawhthannak nih a kan hmuhsak mi a si. Cu cu Krih a fa sinak aa hngatchannak pakhat zong a si. Lungrualnak (Unity) ngei hi Pathian fa kan sinak tehte pakhat a si i, Krih ah pumkhat kan si nak tehte (Eph 4:4)  zong a si. Cun teinak le hlawhtlinnak hrampi pakhat zong a si chih. WCC an motto tlangtar ah doctrine divide, Service Unite an ti bantuk in kan biaknak background le kan chuahkehnak hna ai dan cio ko zongah Jesuh ah pakhat kan sinak, lungrualnak le dawtnak tuanti, tangti, thangthat ti hna usih. Kan nunnak ah Krih ah pumpkhat kan sinak lungrualnak hi kan upat i sullam kan ngeiter si ahcun kan cawnnak le kan tuanhawlnak ah hlawhtlinnak kan hmuh zungzal ko lai. Pathian sungparnak a lang zungzal ko lai. Nihin nithar ah Kan Bawipa Jesuh thawhthannak nih akan phorhmi  thil pathum Nunnak thar, ruahchanhnak le Lungrualnak thluachuah cu kan dihlak cungah hmun cangcim hram seh.   Nan Unau, VawKuu PS: Mah sermon hi 12 APR 2009 Easter Sunday ah chimmi a si.   ================= Life is like a book, everyday is new pages

LAWMHNAK MITTHLI LENHOI

Soure: Metkhuabo Group Mail on 10 April 2009 [Lanhtak Puai thengte ah Bawipa Jesuh a thihnak le Lomhnak Mitthli kong Sermon ttha ngai a si]   "Lomhnak Mithli Lenhoi"   Cawn nili ni zingka fingrei a cah hlan. Hi ni cu tlakrawh sermi liim ding asi caah tuan ah rian ot ding a si. Judah cu tuan ah ka tho lai a ti nain, a thawh hlan ah a innpa hna kio le rak thawng nih a hun thangh. Tual ah a chuak i a hna a tun cu, "Maw ka fapa, na nun a tawi tuk ee, a kan cawmtu ding fa upa bik na si hi na thei lo maw?.... " ti'n a nu a ttap len ko. Alu ai khun i, "An fapa upabik pei a thi hi" tiah a lung chung tein a chim. Cu hnu ah inn dangdang zong in ttah thawng cu a hun theih chin lengmang. Chungkhar tampi in an fa upabik cio an thihnak nih a thinlungah mei bang in a hun kangh...   Inn chungah a lut zokzok i, a fapa upabik Silas, a it ko mi cu a thi maw a nung ti hngalh duh ah a thintur a va tongh. A fapa Silas cu ai tthang i, "Ka pa ziahdah na ka tongh?" a hun ti. Apa nih zei bia chim loin a kaltak. Judah cu a nupi Ruth sinah a va kal. Judah le Ruth nih cun a sullam an hngalh cang caah, cu bantuk ttahhram thawng lak ahcun holh lo ring loin hmaitonh in an i kup. Judah nih din tein a chimmi bia cu, "Jaweih min thangthat si ko seh" a ti i a nupi Ruth nih din tein "Amen" a hun ti piak. An mitthli haimi cu an i hnawh piak veve.   Terual ngai si hna kaw, an fa le cu pakhat hnu pakhat an hong tho. Hngakchia bik nute, holh tam ngaimi Melodi nih bia a hun hal hna.   Melodi:  "Nunu ziah dah hiti mi an ttah zeidah a cang hnga?". Anu nih a pheicungah a hun pom i anu cu fawi le bai ah a holh kho lo, a mitthli cu a fanu biang ah a hong tla.   Melodi: "Nunu ziah na ttah ve?".  Anu nih a lu a thin i, a fanu biang cung mitthli te cu a hun hnawh. Cu hnu ah din tein a hna kam te ah a chimmi cu,   Ruth: "An fa upa bik poah kha vancungmi nih an thah hna".   Melodi: "Nunu, vancungmi cu an va sual ve, ziah ka u Silas hi an thah ve ne lo?". Anu nih a let kho ti lo. A fa upabik cu a hei zoh i alung chung in na naunu hi ngaithiam ko ti'n a mit a hei ttheh.   Judah: "Nan zapi tein mileng khan ah ra u law thla kan cam hna lai" ti'n mileng khan lei ah a kalpi hna. An fanu hniang Melodi cu holh ai tiim nain, a pa nih a kut in a hmur a phihkanh caah a dai tthan.   Judah: "Nizan i sa kan thah mi kha a sullam a tling cang. Kan pu Moses sinah Jaweih Pathian nih a fialmi a si. Sathi kha innka ba ah neh u, a kan ti caah kan nehnak kha a si. Zan lai ah vancungmi an ra i, innka ah sathi ai neh mi inn poah an lanhtak hna. Sathi ai neh lomi inn chungah an lut i, an fa upabik kha an thah hna". Thaba ngai in a hun i din i, a cil a hun dolh. Bia ka peh lai a ti lio ah a fanu Melodi cu inn lengah a va chuak ta duak i, an innka ba cu cho zoh in a hei zoh. Nizan ah apa nih sathi a nehmi a hmuh hnu ah a rak lut tthan.   Melodi: "Papa sathi nehmi inn poah i vancungmi an luh ve lo cu zei sullam dah a si hnga?". Cu biahalnak cu fawi le bai ah an let kho lo. Lanhtak Ni (Passover) sullam tu nih cu Melodi biahalnak cu a fianter. Thla an cam. Thla an cam lio ah an chungkhar dihlak in an i lomhnak mitthli an biang ah a luang. An nu le an pa cu an thlacam bia hmanh an khek kho lo, an ttahnak ah. Thlacam a dih cun Melodi hmanh cu a mitthli a hai ve. An upa bik Silas ko a thlacam thawng a than hlei ah a ttah thawng zong a thang bik. An innka ba ah sathi rak neh hna hlah sehlaw a hei thi ve ko hnga ti a ruah ah a celh in a celh lo.   Khua ahung ceu chin lengmang. Zumlotu Izip chungkhar kip ah ruak pakhat cio an ngei. Ruak hmanh ah fa upa bik, minchawngtu an si hna. Thisen ai nehmi Isarel chungkhar tu cu chung tling tein Bawipa Pathian an thangthat.   Cu ni, an luat ni cu "Lanhtak Ni (Passover)" ai thok ni a si.  Jaweih Pathian nih, "Hi Lanhtak ni hi nan techin fapar tiang na ulh zungzal lai" a ti hna. Isarel mi nih atu tiang hin Jerusalem khualipi ah an ulh zungzal.   Bawi Jesuh le a zultu zong cu Lanhtak puai zawh ding ah Jerusalem ah an kal ve. Jesuh cu an rak tlaih i a sual bia an ceih. A sualnak pakhat hmanh an hmu lo. Pilot nih, "Fung in tu u law, nan Lanhtak puai poah ah misual pakhat thlah a si tawn bantuk in ka thlah tthan lai" a ti hna.   Mipi nih, "Lainawng Barabas tu kha thlah law, Jesuh tu hi vailam ah khenh si ko seh" ti'n awreng chuak in an au. Pilot nih zei a chim ngam ti lo. An kut ah a pek hna. An tuk, an vuak, cil an chak, hnu ah vailamtung an put ter i Kalvary tlang ah an khenhchih. Lanhtak ni le caan theng te ah Jesuh a thih hi Pathian nih a ruahcia mi le a khan cia mi a rak si. Nangmah le keimah kan luatnak hnga ca dingah a si. Hi dawtnak thisen luangmi nih hin na thinlung chungah mei bang an kangh ve cang maw?   Lanhtak lio ah Jesuh a thi, misual Barabas a luat. Lanhtak lio ah Innka thisen nehmi an luat, ai neh lomi fa upa an thi.   Melodi te chungkhar, thisen thawng in Lanhtak ni ah an luat caah "Lomhnak Mitthli" a luang. Jesuh nih hell mei tili in kan luatnak hnga a thisen a thlet. Cu thisen ai nehmi (zummi) poah cu an luat lai... Luatnak Jubilee darklhing cu tum a si cang. An tum tthan ti lai lo. Zungzal ca in an tum cang. Hla nih, "Maw khuaruahhar tiva a luang a kan Khamhbawi chung in, van phak khawh tiang ka hla ttha cu thisen thletmi a si" a ti.   Nihin Lanhtak ni sunglawi ah hin a ttapmi chungkhar maw na si, lomhnak mitthli a luangmi chungkhar dah?   Pu Mang Cung Nung   ================= Life is like a book, everyday is new pages

PCCF EC Visiting

April 8 zan in 10 ni zing tiang caan pek in PCCF hruaitu upa (6) nih Baguio i a um mi PCCF member pawl sin ah an va tlawn hna. Hi caan chung ah Baguio i a um mi PCCF member pawl he i hawikomhnak le thazaang peknak hna zong ngeih a si. Cun Baguio i a um mi PCCF member pawl nih Baguio khua i a dawhnak le a nuamnak hmun hna zong ah an kal pi hna i an i nuam khun hna. Tian zan cu i sian lo bu te in le i hawikomhnak cim lo te in tian a si.
Hmanthlak zoh le download a duh mi caah hika hin hmeh i luh khawh a si.

Biazai

By Robert Cung Cinzah

HAWI DAWT

Khuptthirual he len cim lo in
Va bang tlengkhat lungthin khat in
tlang kan liam tawn ho van hai lo
tthennak phan maw cu ka thin cu
naichailo tin chuah laang ka tha
zei tha hnemlo tlanghra dan hnu

Cerlian ni bang liam tuan ai ee
maw kan caanttha mit tthep kar ah
La bang zeel laang ti awk ttha hlah
liam cia caan hna ai ze ka thin
rua bang tuai tthan um te hnga maw
ti lawng kai nawl ttuan zuam lo in....

SUTTUNG BANG DIR PCCF

Na kum rup lo Na thawng lei hluan
Hoi len hna seh cuailo par bang
ceihphai hna maw na chuah zawn ah
naichailo tin chuncha bang dir
miphun vialte catiang hluan in
Na thawng hal hi ka dai lai lo....

Kan biak Zingnu hal hna u sih
lungthin khat le dawtnak fek he
kan ruah ramttha kan phak hlan tiang
ralttha lungrual kaamlo chuncha
suttung bang dir P. C. C. F
ram le miphun ca zungzal in....!

Atulio Kawlram lei Thawngpang tete

Source: Laiforum Mail (7 April 2009)

Dear, Ramkip um laihri tlai hna,

Kan kawlram lei thawngpang te te theih nan rak duh cio ttheu lai.

1. Kan lai hla sak thiam pawl an man hna

(a) Lai hla phuah thiam le hlasa thiam mi kan nau Samuel HratHmung cu April, 2009 zarhkhatnak ah ( Fantthen khua nu ) he tthitumhnak puai an tuah ti thawng kan theih.

(b) A tu lio i , lai hla sak ah a laar ngai mi Nungak Bilsung cu , March 2009 thok khan nungak a si ti lo, Nutung a si cang. A pasal hi Yangon i a um mi Pu.LalHmung a si. kan lawmh pi hna.

(c) Kan lai tlang lawng si lo in kawlram chung huap in a min a thang mi hla sak thiam LengSungTinPar zong a rauh hlan ah , Va a ngei cang lai ti thawng kan theih. A pasal ding hi, Pu VaiSe le Pi MahKhin an fapa u pa bik ( a min ??) a si i , Japan ram ah engineer a kai lio mi a si. April. 09 a zarhkhat ah khan kap hnih nu le pa nih hna tlak pi nak zong an ngei cang ti thawng kan theih.

2. A tu lio thil man pawl

A tu lio kawl ram ah thil man a mah ning ti awk an si.

-Datsi Gallan 1= FEC 2.50 Ks- 3000/ Dizel gallan 1= FEC 2.30 ks- 2300 an si.
- GSM mobile man cu ting 17 in 20 kar hrawng a si.
- Motor man an tla ngai te nikum 2008 lio i ting 500 hrawng a si mi Suzuki wagon R cu a tu ah ting 320 hrawng lawng a si, 2008 lio i, ting 120 a phan mi Nissan sunny cu, a tu ah ting 60-70 kar lawng a si. a dang motor phun pawl zong a man an tla dih hna.
-

Motor cit man
a. Yangon- mandalay Ks- 10400- 9000 kar
b. Mandalay- hakha ks- 16000/-
c. Mandalay- kalay ks- 8000- 10000 kar.
d. Kalay- hakha ks- 6000- 7000 kar
e. Kalay - tio ks- 8000- 12000 kar an si hna.

-Yangon khua chung taxi man an tla ngai.. Sule in N. dagan ks 3000 hrawng a si. khuachung lam neih nak te te cu ks- 1000/- in kal khawh a si.
- Yangon khua chung taxi an chia ngai hna ( aircon ) ai tel mi an um ti lo. a tam deuh cu CNG ti mi ( Gas) in mawngh mi deuh hi an si hna.
- 2008 kum ah Nagis thlichia nih kawlram thlang lei a deng ruang ahkhan Yangon khua zong fak ngai in a den ve. Yangon khuachung ah thingkung tamtuk a thluk caah, tukum thal ah Yangon khua cu kumdang nak in a lin khun.

Rawl ei man
Yangon le mandalay kar motor ai dinhnak ah rawl ei ( sa phun 2 le vegetable phun 1 ) ah ks-2000/ saphun 1/ veg phun 1 a si ah cun ks-1500 a si. Mandalay le hakha kar cu ks-2000 in ks-2500 kar an si i, Tio le kalay kar tu cu ks-2500 a si.

Adangdang thil man pawl

a. facang bag 1 ah ks-12000 - 24500 kar an si . ( a phun a tam ngai hna)
b. Chiti cuai 1 ah ks- 3000-2500 kar a si.
c. Ngasa cuai 1 ah ks- 2500- 6000 kar an si..
d, Voksa cuai 1 ah ks- 3000- 6000 kar
e, arsa cuai 1 ah ks- 5500-6500 kar
f. arti /cawmpei ti pum 1 - ks-90 in 100 kar
g.Lakphak ti hrai 1 ks- 200/-
h. beer hrai 1 ks- 500/-
i. thingthei hang pawl ks- 400/-

3. Summer Camp

Kawlram ah April 13 in 18 kar hi yelawngpuai a si caah, zung kip le sianginn kip zong an khar cio hna lai, hi lio caan ah kan nau le kan fa le pawl an vaivun sual lai ti in khua kip um kan nu le kan pa le pawl khua khan nak in khua kip ah an mah le si khawh ning cio in camping le training tuah ding in an i tim lam cio hna, Yangon le mandalay um lai mi tam nawn zong lai tlang lei ah chungkhat tlawn ding in an va tlung ta cio hna, Tu kum Mandalay le Yangon kan lai mino pawl cu ( TanTaungkyi ) khua pawng ah summer camp ngeih ding in timhtuahnak an ngei ti thawng kan theih.

A cung lei thil man le thawng pang te te pawl hi Yangon le Mandalay khua 2 thil man deuh an si.

Kai lawm.

Thangzalian
Mandalay.

Tlawm Deuh In Chim Law, Tam Deuh In Ngai

(Speak Less, Listen More)

By Thawng Peng

Naihrawng cu ka holh a tam chuachuah. Ka hmur zong a sau dom. Ka zei dek a ti ual. Mi bia ngaih ruam kai zal lo. Ka chim deuhdeuh, ka palhmi a tam deuhdeuh. Ka chim deuhdeuh mi ngaihchiatnak, lungfahnak le nun nuamhlonak ka chuahpi deuhdeuh. Mi kong ceih hrim te nih a ka thawt tuk. A sengh in kai senghtlaih lomi mi kong hna dawh hlawptlo dom in ka ceih cu! Biaphei in chim ding zong biatung in ka chim. "Bianem chim le lamphei kal" tiah phungthluk kan ngei nain ka kaa in bianem an chuak kho ruam lo, biahrang lawngte an chuak. Hruh le ngaat hlei i, molh le tamh i chap hi cu a poi kho sing tuk.

Bia tam deuh na chim paoh ah tam deuh in na sual ve sual ko lai, cucaah na fim ahcun bia nai sum lai (Phungthluk Bia 10:19).

Na lungre a theih deuh paoh ah mangchia na manh deuh ko lai, cu bantukin tam deuh bia na chim paoh ah hruhnak bia kha tam deuh na chim sual ko lai (Phungchimtu 5:3).

Hitihin Baibal nih ralrinnak a kan pek ko nain fawh, kaaciip ruam zal loin arfa ciap in ka ciap cu! Kai chir dom. I chir len zongah zei tthahnem ti hlah, ka chim cang leh cu teh. Asinain, hmailei ah zeiti tal in kai siamremh kho hnga maw, tiah "tlawm deuh chim ttung i, tam deuh ngaih" he ai pehtlaimi ca le phungthluk ka kawl. Tampi ka hmuh nain Guy Harris nih a chimmi hi ka duh cem. Hihi ka zulhkhawh ahcun zeimawzat cu kai siamremh kho hrimhrim lai, tiah ka ruah. Cucu ka van in siaherh ve hna.

1. Listen to understand, not to respond

Minung pakhat nih bia a chim tikah a chim duhnak le a sullam ruat hmasa loin le fiang set lo buin leh colh a hmangmi kan um. Cun, micheu cu bia an chimmi, ca an ttialmi fian hmasa i tim loin zeitindah ka leh lai, tiah chizawh zu bawh in a bawh mi kan um fawn. Lai Forum le Rungcin a rel pahmi nih cun nan fiang ko lai. Cucaah, mi chimmi bia fian i zuam hmasa hna usih law, cu hnu ah let hna usih. Hihi Guy Harris nih cun baseball game he a tahchunh:

To listen effectively, I suggest that you view dialogue more like a pitcher and catcher in a baseball game. The pitcher (speaker) throws the ball for the catcher (you) to receive it. The catcher only throws the ball back after he has it firmly in his grasp.

In other words, listen to receive the meaning. Once you understand, then you can respond.

2. Be quiet or be silent

Mi pakhat nih lungtho ngai in le i biatak ngai in bia a chim lioah kan theihmi le kan hngalhmi hnihchun te ka chim manh lai lo, ti phun in a chimmi a dih hlan ah i thlak duduk kan hmang tawn. Bia an chim lioah cun dai tein ngai hmasa ko usih, kan chim caan a phan ve ko lai. Dai tein um hi bia ngaih phunkhat asi. Guy Harris nih cun hitihin a ti:

· Being quiet gives you the opportunity to hear the words, the tone, and the meaning behind the words.

· When your mouth is open, your ears are closed.

· LISTEN and SILENT have the same letters.

3. Let them finish their thoughts

Hihi No. 2 he ai khat nawn ko. Mi bia tan a hmang tuk mi kan um ttheu. Mi pakhat nih a chimmi bia kha kan theih cia asi ahcun uite ekchuak bak kan lo. Ka theih cia, ka hngalh cia ti phun in a bia ngai duh lo bantuk, khua dang i hoiter bantuk, lu i kheuhter bantukin kan um tawn. Cucu kan palh tawnnak asi. Ziah tiah cun, kan chimmi le kan theihmi ai khah ko zongah sullam tampi in hrilhfiah khawh asi. Phundang in chim ahcun, kong khat nih hin sullam tampi a ngei. Cucaah, na theih cia le na hngalh cia an chim len zongah an duhnak le an ruahnak kha tling khitkhet in a dongh cikcek tiang chimter ko hna.

4. Maintain eye contact

Bia ka chim lio i an ka zoh lo ahcun ka biachim tha a tho kho bak lo. Nan si cio lai dah ka ti.. Zei ca’h tiah, kan bia an ngai lo, tiin kan ruah hna. Bia na chim lioah ka zoh hna seh, ti na duh bantukin va zoh ve hna. Keimah hi ka zual khun rua; bia an chim lioah vawlei i virhter bantuk, ca dang i relter bantuk (hawi hlei carel pi bang) in ka um a tlawm lo. “Zoh” hi a biapi taktak. Zeiruang tiah, zei maw caan ah cun an chimmi bia nakin an kut le an ke in an piahmi nih an chim duhmi a fianter deuh tawn. Ka Pu Lal hi a holh a aa tuk le a chimmi bia a dih hlan ah a kutke in a piahmi zohnak in a chim duhmi theih chung khawh asi. Sopum Hram Zi hi a holh kho lo le a kutke le a mithmai in a piahmi na zoh lo ahcun a chim duhmi hi na chanchung na fiang kho lai lo. Guy Harris nih cun tihitin a ti:

“Good listeners learn to “listen” with their eyes as well as with their ears.”

5. Ask questions to ensure that you understand

Bia an chim. Na ngaih i na theih. Asinain, ka fiang dih tiah va ruat hlah. Na fian lomi a um tikah na fiang na lo bu pi in va let colh hna hlah. Na fianlonak zawnte kha “hi zawnte hi ka fiang deuh lo” tiah hal hmasa hna law, an in chimh tthan hnu ah va let te hna.

Good leaders are good listeners. Effective listening helps to resolve conflicts, build trust, inspire people, and strengthen teams.. It often requires you to “bite your tongue.”

A tanglei mifim bia le phungthluak bia pawl hi a cunglei ca bawmtu dingah ka van telh chih hna.

“If you wish to know the mind of a man, listen to his words.” Chinese Proverb

“We have two ears and only one tongue in order that we may hear more and speak less.” Diogenes Laertius

“He understands badly who listens badly.” Welsh Proverbs

“One of the best ways to persuade others is with your ears - by listening to them.” Dean Rusk

“Speak your truth quietly & clearly; and listen to others, even the dull & ignorant; they too have their story.” Max Ehrmann,

“When the mind is thinking, it is talking to itself.” Plato

“From listening comes wisdom, and from speaking repentance.” Italian Proverb

“Children have never been very good at listening to their elders, but they have never failed to imitate them.” James Baldwin

“Most of the successful people I've known are the ones who do more listening than talking.” Bernard Baruch

“Before you speak, listen.” William Arthur Ward

LAIMI le ORPHANAGE MINISTRY

Source: LAIFORUM, Posted on 16 March 2009

Dear Laiforum unau vialte hna,

Kawlram in kut kan tlaih hna.

Laiforum ah orphanage ministry he pehtlai in zawn nan ruahnak tampi nan van tialmi ka hmuh tikah nan cungah lunglomhnak tampi ka ngei. PT le laimi nan dawtnak a langhter. Pu/Tv. Van Biak Thang nih Chinland Guardian (15 Macrh, 2009) ah a van tialning ah laimi nih tuahmi ngaktah/hngakchia zohkhnehnak 50 tluk cu Cozah nih an kharpiak hna tiah a ti. Ramchung ummi nih thawngtheih kan i harh caah, a kan lauter, kan thin a kan phanter chinchin ve. Nan thlacamnak tampi kan herh taktak.

Mah le mah introduce hmasa hnu ah hi kong he pehtlai in ka ruahnak tlawmte in van tial ka duh ve. Dr. C. K. Hrang Tiam (Benny pa) ka si i, Yangon MEGST (Evangelical School) ah Theology department Head le Director - Post Graduate Studies (M.Th. D.Min.) tuan pahin hngakchia zohkhenhnak cu kum 2007 in kan thawk ve.

Atulio orphanage thawngpang he pehtlai in, hitin van tial ka duh. Dr. Siam Lian nih kan hnulei ah khan a phungchimnak ah hitin a chim i ka lung a ka ton ngai te, "Ngaktah cawmkennak hi Pathian nih a duhmi le thlua a chuahmi rian a si. Cucaah, kan khuami (Zaangtlang) cu hi riantuannak hi tuah cio dingin ka forhfial hna...Asi na belte in Khrihfabu (Church) nih hi riantuannak hi nan kan theihthiampiak lo caah mit kan aupi in, tha kan pe u law, kan dirkamh deuh uh" tiah a ti.

Si, hi bantuk riantuannak cu Pathian nih a duhmi le thlua a chuahmi a si taktak ko. Asinain, hihi Pathian rian a si caah kan i ralrin a herhmi tampi a um. Cinghngia (fox) lak a tlawngmi tuu (sheep) bantuk kan si hi kan philh lo a tha. Cun, thlarau tlau tlaihnak (zumlotu hna zumtu sernak hmun) hmun a si caah kan Cozah nih a rem ziar lomi a si zong kan theih a hau. Rul bantuk in kan fim i thuro bantuk in kan nun a nem zong a herh. Kan duhlo-kan huatmi thil le, kan thintawinak zawn zongah a herh ahcun kan i sumthiam a herh.

Thawngpang ka theih khawhtawk ah, atu lio kan boruak/sining (problem) ai thawknak hi kanmah ngaktah zohkhnehtu hna daithlan le tlamtlinlonak in ai thawkmi si dawh a si. Point tete in ka vantial lai.

1. Orphanage ministry hi sipuazi i a hmang tawk rak um dawh kan si. Orphanage pakhat cu ralkap le police nih an va hlathlai lio hna ah hngakchia pakhat nih piat (onion) a cheu kha meh ah an rak i meh kha an hmuh. A tuahtu pa nih le cellphone he um i, bawi ngaingai bantuk in a um an ti i, an mit a kem ngaite an ti.

2. Nungak no tete zuatnak hmun (the place of Child exploitation) ah an kan hmuhpiak: Atu lio kan sining ai thawknak pakhat rih cu mah cawmmi ngaktah chung in nungak 5-6 ai chiahmi hna um dawh kan si. Cucu, mizei Cozah poah nih an huat tukmi child exploitation phunkhat a si ve ko. Kan hnulei teah ka hawipa pakhat nih "Nan nih cu hngakchia tlawmte lawng zohkhneh ko hna uh mu. Hngakchia tampi ngeih hi nungak tampi ngeihnak sidawh asi ko hih" tiah capo biatak in a ka ti. Ruah setset tikah ningzak thil a si taktak ko. Cucaah, hmailei le bang ahcun nu (nu hmei maw, nu nawlngeihnak tamnak hmun) nih tuahmi deuh poah ah nu-hngakchia deuh zohkhenh le, pa (pa hmei (or) pa tavuan lakmi) tuahmi ah pa hngakchia deuh zohkhenh ah a thacem zong a si kho men. Zumlotu mithmuh ah thlankhur a liam deng cangmi putar pipi nih virgin i zuatnak hmun ah hmuhpiak mi a lo cang. Siangpahrang David a thih lai i virgin nungak note a taksa lumh tuah an fial bantuk phun hna lawh sual a fawi.

3. Abortion (Nau rawknak hmun) hmun ah hmuhpiak kan si hoi: Atu lio kan sining ai thawknak pakhat rih cu nungak no tete ngeihnak hmun lawng silo in naurawknak hmun ah hmuh kan si hoi. Naupawi ruangah naurawknak maw, asilo ah, a thli te i i tlunternak hmun ah hmuh kan si caah Acozah chimlo, mah le mah hmanh lungtlin a har ngaingai ko. Ngaktah hna mitthli hnawttu silo in an mitthli a chaptu a simi kan tam chin lengmang ko rua. Kan hnu ah ngaktah in a chuakmi nu a thitu pa cu hitin ka capoh. "Nang cu, nan nu an hliamh manhlo i a tha ngai ko cuh" tiah ka ti i a ka lehmi cu "Theihlo a si ko" tiah a ti. Ngaktah ministry in a chuakmi a thila (Married) tu tampi zong an lung a hring ngai ko cang rua.

Cucaah, hi rian kan tuannak ah cinghngia lak tuu kan si hi thei buin, ralring le Pathian mithmai zoh tein tuan le zohkhneh i zuam ko hna u sih. Zisuh nih a zultu hna cu, nan dinfelnak nih Farasi mi hna dinfelnak cu a lonhawk a si ati bantuk in kan pawngkam zumlotu hna nih kutdong in an kan sawhkhawh mi kan silonak lai van tialmi a si. Hi ca hi, a chungmi (Hngakchia zohkhenh vemi) bantuk in tialmi a si caah ahohmanh sawh hnawh mi ka ngei lo.

Ralrin kan thaimnak caah,

Dr. C. K. Hrang Tiam / Benny Pa
Yangon.

***

PCCF Cung Pathian nih thluachuah chin seh

PCCF Cung Pathian nih thluahchuah chin seh
A Phuah Tu - Pastor. Sang Vung


A hla bia na duh ah cun ...

Fingtlangsang cung in khuaza cuanhkho dingin laimiphun cu
Cung Pathian nih a thimmi miphun kan si
Khuaza ramkip ah fimnak kawl in vawlei cung kan cul dih
A kan hruaitu Pathian thangthat siseh.

Tlengkhat thuti va bangin lungkhat in kan zuang lai
Pathian pekmi Lairam thanchonnak ding caah
A nungmi raithawinak bang i pumpe cio u sih
PCCF Cung Pathian nih thluachuah chin seh.

Kum thawnghnih kumhnih October thla nikul le niruk ah
Miphun tungtu PCCF dirh a si,
Cung Pathian sin ah thlaza cam in thimmi hruaitu hna nih
Kamlo chuncha bangin an kan dirpi.

Kan tlangsang bangin fimnak sang seh horthuk bangin ruahnak
Thuk ve hnaseh Laimiphun kan dihlak in
Zilthli nem bangin kan lung nem seh kan tithiang hna bangin
Kan lung thiang seh kan ram le mi phun ca'h